Կոսովո երկրամասը չի կարող դառնալ ՄԱԿ-ի անդամ առանց Սերբիայի ազգային շահերը հաշվի առնելու: Այս մասին լրագրողներին հայտարարել է Սերբիայի վարչապետ Իվիս Դաչիչը:
Դաչիչը նշել է, որ Սերբիան երբեք չի համաձայնի, որ Կոսովոն անդամակցի ՄԱԿ-ին, եթե միայն դա չլինի որևէ որոշման արդյունք, որը կհամապատասխանի իրենց ազգային շահերին:
«Սակայն մենք շատ հեռու ենք դրանից, դա գիտական ֆանտաստիկայի ոլորտից է: Հաշիմ Թաչին (Կոսովոյի վարչապետ) ավելի լավ է խոսի Կոսովոյի հյուսիսի և կոսովցի սերբերի ինքնավարության մասին»,- հավելել է Դաչիչը:
Հիշեցնենք, որ Կոսովոյի ալբանական իշխանությունները 2008 թ. Բելգրադից անկախություն են հռչակել և այդ ժամանակից ի վեր փորձում են անդամակցել տարբեր միջազգային կազմակերպությունների, այդ թվում՝ ՄԱԿ-ին:
Բելգրադի և Պրիշտինայի ներկայացուցիչները պարբերաբար հանդիպում են Բրյուսելում՝ երկրամասի քաղաքացիական բնակչության հարցը լուծելու համար, սակայն քննարկում են նաև քաղաքական հարցեր: Դաչիչի և Թաչի առաջիկա հանդիպումը կայանալու է հունվարի 17-ին՝ ԵՄ դիվանագիտության ղեկավար Քեթրին էշթոնի միջնորդությամբ:
