Քրդական Kurdistan.ru կայքի փոխանցմամբ, Իրաքյան Քրդստանի բնական պաշարների նախարարը հայտարարել է, որ իրենց գազային պաշարները բավարար են Nabucco գազատարով նվազագույնը 100 տարի ժամկետով գազ առաքելու համար: Գազատարն առայժմ նախագծման փուլում է և ունենալու է տարեկան 31 միլիարդ խորանարդ մետր թողունակություն:
Նշվում է, որ շատերի կարծիքով, Իրաքյան Քրդստանում կարող են հայտնաբերվել Իրաքի խոշորագույն նավթահանքերը: Իրաքյան Քրդստանի Շեյհան նավթահանքում նավթարդյունահանությամբ զբաղվող բրիտանական Gulf Keystone Petroleum ընկերության գործադիր տնօրեն Թեդ Քոզելը գտնում է, որ միայն Շեյհանի նավթային պաշարները գնահատվում են 1.9-7.4 միլիարդ բարել նավթ:
Ընդհանուր առմամբ, Իրաքյան Քրդստանի նավթային պաշարները գնահատվում են 45 միլիարդ բարել: 2003 թվականից սկսած` Իրաքյան Քրդստանում իրականացվել է 49 նավթային նոր հորատում: Իսկ երկրի գազային պաշարները տատանվում են 106-212 տրիլիոն խորանարդ մետրի միջև: Հատկանշական է, որ Nabucco գազատարով նվազագույնը 100 տարի ժամկետով գազ առաքելու մասին բարձրաձայնելիս հաշվի է առնվել դրանցից առաջին (106 տրիլիոն) տարբերակը:
Նշվում է, որ Իրաքյան Քրդստանի տարածաշրջանային կառավարությունն արդեն իսկ 37 գազային ու նավթային պայմանագիր է կնքել 17 երկրներ ներկայացնող 41 օտար ընկերությունների հետ:
Հիշեցնենք, որ հունվարի սկզբներին Իսրայելում լույս տեսավ քուրդ-իսրայելական հարաբերություններին նվիրված մի հոդված, ուր նշված էր. «Այժմ, երբ Իրաքի կառավարությունն անուժ վիճակում է, իսկ իրաքյան քրդերը հռչակել են եթե ոչ իրենց ինքնիշխանությունը, ապա գոնե ինքնավարությունը, Իսրայելը պետք է առավել բաց խաղա քրդական հարցում:
Եթե Իսրայելն աջակցի Հյուսիսային Իրաքի քրդերին, ապա դրանով իսկ սպառնալիք կներկայացնի քրդական ստվար բնակչություն ունեցող Թուրքիային, Իրանին, Սիրիային ու Իրաքին: Եվ դա Իսրայելին միայն օգուտ կբերի, ոչ մի բացասական տարր չկա դրանում:
Նավթի վիթխարի պաշարներ ունեցող Իրաքյան Քրդստանն անմիջապես կվերածվի աշխարհի ամենահարուստ երկրներից մեկի և կհանդիսանա Իսրայելի հուսալի գործընկերը: Իրաքյան Քրդստանը պատմական հնարավորություն է Իսրայելի համար, և դրանից չօգտվելը կհամարվի հանցագործություն»:
Այս հոդվածում նշվածն այժմ Իսրայելի համար խիստ արդիական է, քանի որ թուրք-իսրայելական հարաբերությունների կտրուկ սրումից ու Մուբարաքի հրաժարականից հետո Իսրայելը զրկվել է իր տարածաշրջանային դաշնակիցներից: Շատերի բնորոշմամբ, Իրաքյան Քրդստանը կարող է վերածվել ԱՄՆ-ի ու Իսրայելի տարածաշրջանային «ավիակրի»: