Նյու Դելիի դատարանը այսօր մահվան դատավճիռ է կայացրել 3-ամյա աղջկա բռնաբարության ու սպանության մեջ մեղադրվող անձին` հայտնում է Times of India թերթի ինտերնետ-պորտալը:
Հետաքննության տվյալով՝ 56-ամյա Բհարաթ Սինգհը, ով Դելիի արվարձանում գտնվող տներից մեկի անվտանգության աշխատակիցն էր, 2011թ. ապրիլին բռնաբարել է մոլորված 3-ամյա երեխային, որը ստացած վնասվածքների հետևանքով մահացել է` հայտնում է RIA Novosti-ն:
Այս տարվա հունվարին Սինգհի գործը ուղարկվել էր դատարան, որը արդեն 10 օր անց կայացրել է մահվան դատավճիռ:
Դատարանը վճռել է, որ «այդպիսի մարդիկ (ինչպիսին Սինգհն է) վտանգավոր են հասարակության համար ու արժանի չեն գթության»: Մահապատժի իրականացման օրը հայտնի չէ:
Սա առաջին դատավճիռն է, որը մայրաքաղաքային դատարանը կայացրել է արագացված գործընթացով:
