Բարաք Օբաման մինչ երդմնակալության արարողությունը նախագահական լիմուզինին կվերադարձնի Կոլումբիա շրջանի կարգախոսը՝ Taxation Without Representation (Հարկումը՝ առանց Կոնգրեսում ներկայացման) հայտնել է Սպիտակ տան ղեկավար Քեյթ Մելեյը:
Կարգախոսը ավտոմեքենայի համարանիշերի վրա տեղադրվել էր 2000թ.՝ որպես բողոքի նշան այն բանի, որ ԱՄՆ մայրաքաղաքի բնակիչները չունեն քվեարկող ներկայացուցիչներ Կոնգրեսում, թեև հարկեր են վճարում դրա համար, ինչպես երկրի մյուս բոլոր քաղաքացիները, որոնք ապրում են այլ նահանգներում:
«Նախագահն ապրում է շրջանում արդեն 4 տարի և իր աչքով է տեսնում անարդարությունը վաշինգտոնյան ընտանիքների նկատմամբ, որոնք ջանասիրաբար աշխատում են, հարկեր վճարում ու երեխաների մեծացնում՝ Կոնգրեսում ձայն չունենալով: Այդ համարների տեղադրումը ընդգծում է Օբամայի աջակցությունը նրանց իրավունքների համար պայքարում»,- հայտնել է Մելեյը լրագրողներին:
Կարգախոսը ժամանակին իր լիմուզինի վրա էր տեղադրել ԱՄՆ նախկին դեմոկրատ նախագահ Բիլ Քլինթոնը, սակայն հանրապետական Ջորջ Բուշ կրտսերը դրանք հանեց իր ծառայողական ավտոմեքենայի վրայից:
Օբաման, որի երդմնակալությունը նախատեսվում է հունվարի 21-ին, մտադիր է այդ մեքենայով շրջել մինչ իր նախագահական ժամկետի ավարտը:
