Վրաստանի հայ համայնքի ղեկավարներ Արմեն Գևորգյանն ու Ռուբեն Շիկոյանը որպես քաղբանտարկյալներ ազատ արձակվեցին:
«Նրանք նոր են դուրս եկել, գնացել են տուն հանգստանալու, վաղը կամ մյուս օրը կգան Թբիլիսի, կհանդիպեն մեզ հետ, և կխոսենք իրենց հետագա անելիքների մասին»,-«Առաջին լրատվական»-ի հետ զրույցում ասաց «Բազմազգ Վրաստան» քաղաքացիական նախաձեռնության նախագահ Առնոլդ Ստեփանյանը։
«Նրանք երկուսն էլ դատապարտվել են որպես «ռուսական լրտեսներ», բայց ակնհայտ է, որ այդ գործը միայն քաղաքական ենթատեքստ ուներ: Պարզ է, որ մեղավոր չէին: Նախկին իշխանություններն էլ ոչ մի հետաքրքրություն չունեին այդ գործն արդար քննելու մեջ, իսկ տղաներն ընդամենը մի քանի չինովնիկների անձնական հետաքրքրությունների զոհն էին: Այն ժամանակ, երբ բանտում էին, նրանց հանդեպ նույնիսկ շանտաժ են իրականացրել. իշխանություններն ուզում էին հայտնի շատ ուրիշ հայերի էլ նստացնեին՝ որպես նրանց հանցակից, և այդ մարդկանցից մեկն էլ ես էի»,- հավելեց Ա. Ստեփանյանը:
Խոսելով այն մասին, թե ինչու ազատ չարձակվեց Վահագն Չախալյանը, Ա. Ստեփանյանն ասաց, որ նրա ազատ արձակվելը նույնպես իրատեսական է։ «Հատկապես Իվանիշվիլու Հայաստան կատարած այցից հետո հնարավոր է մի բան փոխվի: Ասեմ նաև, որ երկրորդ ցուցակ են պատրաստելու քաղբանտարկյալների համար, և կարծում եմ՝ նրա անունն այնտեղ կլինի:
Ընդհանրապես մի մասին որպես քաղբանտարկյալներ են բաց թողել, մի մասին էլ՝ համաներումով: Վահագին որպես քաղբանտարկյալ չեն թողել, իսկ համաներումով կթողնեն, պարզապես դա կնշանակի, որ ինքը մեղավոր է և ընդունում է մեղքը: Նա ուզում է, որ իրեն որպես քաղբանտարկյալ բաց թողնեն: Իսկ առաջիններն, ովքեր դա թույլ չեն տա՝ Սաակաշվիլու պատգամավորներն են»,-ասաց Առնոլդ Ստեփանյանը:
Չախալյանի փաստաբան Ստեփան Ոսկանյանը մեզ հետ զրույցում նշեց, որ պաշտոնապես չի կարող հայտարարել, թե Իվանիշվիլիի՝ Հայաստան կատարելիք այցի ընթացքում կքննարվի նաև Վահագն Չախալյանի հարցը, բայց, այնուամենայնիվ, նաև չբացառեց. «Ես հինգշաբթի օրն այցելելու եմ Վահագն Չախալյանին և կհանդիպեմ Վրաստանի մի քանի պաշտոնատար անձանց հետ, դրանից հետո նոր արդեն պարզ կլինի, թե ինչպես է լուծվելու իմ պաշտպանյալի ազատ արձակման հարցը»:
