Մեքսիկայում դաշնային վարչական դատարանը չի բավարարել Ադրբեջանի դեսպանատան հայցը, որը փորձում էր հասնել Հեյդարի Ալիևի հուշարձանի ապամոնտաժման արգելքին, հաղորդում է Cronica-ն:
Հուշարձանը, որին վերաբերում է խոսքը, 2012թ. ամռանը դրվել էր Մեխիկոյի կենտրոնական այգում: Հաղորդվել էր, որ ադրբեջանական կողմը այգու վերակառուցման համար ներդրել էր շուրջ մեկ միլիոն դոլար:
Ադրբեջանի երրորդ նախագահի հուշարձանը կանգնեցնելու տեղի իշխանությունների որոշումը դարձել էր քննադատության առարկա, մասնավորապես իրավապաշտպանների կողմից: Վերջերս Մեքսիկայի կառավարության ներկայացուցիչը հանդես էր եկել ի աջակցություն այդ քննադատության և հայտարարել, որ բռնապետի հուշարձանը պատիվ չի բերում Մեխիկոյին:
Նոյեմբերի վերջին փորձագիտական հանձնաժողովը քաղաքային իշխանություններին խորհուրդ տվեց Հեյդար Ալիևի հուշարձանը կենտրոնական այգուց տեղափոխել: Նշենք, որ քաղաքային իշխանությունները դեռևս վերջնական որոշում չեն կայացրել այս հարցի վերաբերյալ:
Ադրբեջանի դեսպանատունը հանդես է եկել ընդդեմ հուշարձանի ապամոնտաժման: Դիվանագիտական ներկայացուցչությունը հայտնել է, որ հուշարձանն այգում է դրվել տեղի իշխանությունների և Ադրբեջանի դեսպանատան համատեղ համաձայնության արդյունքում: Մեքսիկայում Ադրբեջանի դեսպան Իլհար Մուխթարովը հայտարարել է, որ եթե հուշարձանն ապամոնտաժվի, ապա դա կտրուկ կվատացնի երկու երկրների միջև հարաբերությունները:
2012թ. նոյեմբերին Մեքսիկայի շրջանային դատարանը չի բավարարել Ադրբեջանի դեսպանատան հայցը՝ ուղղված հուշարձանի ապամոնտաժման դեմ, իսկ 2013թ. հունվարի 9-ին դաշնային վարչական դատարանը կայացրեց համանման որոշում:
