Իրանի ԱԳՆ մամլո խոսնակ Ռամին Մեհմանպարաստը պահանջել է Սիրիայում վերջ տալ բախումներին՝ ասելով, որ բռնության շարունակությունը կհանգեցնի արաբական այդ երկրում մարդկային հետագա կորուստների: Այս մասին հայտնում է իրանական Press TV-ն:
«Մենք կարծում ենք, որ բախումները պետք է դադարեն, քանի որ հակամարտության և բռնության ընդլայնումը վտանգում է մարդկանց կյանքն ու կհանգեցնի սիրիացիների և Սիրիայում գտնվող այլ երկրների քաղաքացիների հետագա կորուստների» ,- այսօր հայտարարել է նա:
Իրանցի պաշտոնյան կրկին հայտարարել է, որ սիրիացի ժողովրդի իրավունքները պետք է հարգվեն, և սիրիացիներին պետք է թույլ տրվի արդար ընտրությունների միջոցով որոշելու սեփական ճակատագիրը:
Մեհմանպարաստը մերժել է Սիրիայում ցանկացած արտաքին ռազմական միջամտության հնարավորությունը և ասել, որ պետք է ազգային երկխոսության հիմքեր ստեղծվեն:
