Ինչպես արդեն հայտնի է, Վրաստանում հայ քաղբանտարկյալ Վահագն Չախալյանը դուրս մնաց ըստ «Համաներման մասին» օրենքի` ազատ արձակված շուրջ 3000 բանտարկյալների ցուցակից, և այսպիսով հերքվեց այն տեղեկությունը, թե Չախալյանն ազատ է արձակվելու: Այսօր լրագրողների հետ հանդիպմանը վրացագետ Ալիկ Էրոյանը նշեց, որ այն հոդվածները, որով Չախալյանին մեղավոր են ճանաչել, մտնում են համաներման չափանիշների մեջ, և այն, որ նրա անունը դուրս է մնացել ցուցակից, մեկ անգամ ևս ապացուցում է քաղաքական ենթատեքստի առկայությունը:
«Հատկապես պետք է կոչ անել վիրահայությանը, որպեսզի նրանք ակտիվորեն մասնակցնեն Չախալյանին ազատ արձակելու գործընթացին: Ես կարծում եմ` սա անպայման արդյունք կտա»,- ասաց վրացագետը:
Ալիկ Էրոյանը նաև նկատեց, որ ներկա իշխանությունները հայ համայնքին տված իրենց խոստումները չեն կատարում. «Նրանք չեն կատարում իրենց խոստումները, և պետք է նաև նշեմ, որ ակնառու է նաև հետևյալ հանգամանքը. Վրաստանի գործող և նախկին իշխանությունները փաստորեն համակարծիք են Վահագն Չախալյանի հարցում: Ես կարծում եմ, որ գործը դատական կարգով պետք է լուծվի, և հուսով եմ` դրական արդյունք կստանանք»,- եզրափակեց վրացագետը:
