Դիմահարդար Լի Թիլլեթը, ով դեռ 2004 թ. ստեղծել էր Kroma անվանմամբ կոսմետիկ միջոցների հավաքածուն, պնդում է, որ Քարդաշյան քույրերը գողացել են բրենդի անվանումը՝ իրենց սեփական Khroma Beauty կոսմետիկ միջոցների համար։ Ինչպես փոխանցում է Showbiz Spy-ը, այն թողարկվել է անցած տարի և շուկայում արագ ճանաչում է վայելել:
Թիլլեթը Քիմ, Քորթնի և Քլոե Քարդաշյանների դեմ հայց է ներկայացրել դատարան՝ պահանջելով 10 միլիոն դոլարի հոգեբանական վնասի փոխհատուցում, ինչպես նաև փոխհատուցում է պահանջել Boldface Group Inc-ից, որը զբաղվում է այդ կոսմետիկայի վաճառքով: Դեռ անցած տարվա հուլիսին դիմահարդարը նամակ էր ուղարկել ընկերության գրասենյակ՝ իր ստեղծած անվան անօրինական օգտագործումը դադարեցնելու խնդրանքով, սակայն նրա դիմումն անտեսվել էր:
«Ես ինքս եմ ստեղծել և զարգացրել Kroma հավաքածուն՝ իմ սեփական աշխատանքով, դրա վրա շատ ջանք եմ թափել և այժմ օրինական գործողությունների եմ դիմում՝ այն պաշտպանելու նպատակով: Ես ստիպված եմ դատական վեճի մեջ մտնել Քարդաշյան ընտանիքի հետ, քանի որ նրանք վերցրել են այն, ինչ իրենց չի պատկանում»,- ասել է դիմահարդարը:
