ՀՀԿ փոխնախագահ Ռազմիկ Զոհրաբյանը կարծում է, որ հաջորդ խորհրդարանում գործարարները քիչ կլինեն: Այսօրվա ասուլիսին, պատասխանելով «Առաջին լրատվական»-ի հարցին, պարոն Զոհրաբյանը հայտարարեց.
«Մեզ մոտ չկա ո՛չ հին սերունդ, ո՛չ նոր սերունդ, մարգարյանական, նավասարդյանական թև չկա, կուսակցությունը մեկ միասնական թիմ է: Նոր խորհրդարանում կլինեն և՛ ժողովրդի ներկայացուցիչներ, և՛ մասնագետներ: Էդպես էլ եղել է, գուցե մի քիչ շատ են գործարարները, հաջորդ խորհրդարանում նրանք քիչ կլինեն»,- հայտարարեց նա: Նա ասաց, թե ինքն առանձնապես մեծ ձգտում չունի կրկին պատգամավոր դառնալու:
«Ես կզիջեմ կուսակցությանը, բայց կուսակցությունը գուցե չզիջի և ինձ գործուղի խորհրդարան»,- անկեղծացավ նա:
Ռազմիկ Զոհրաբյանը խոսեց նաև 2008 թ. մարտի 1-ի հայտնի դեպքերի մասին՝ ասելով, որ նման ընդհարումներ չպետք է թույլ տանք: Հարցին, թե դուք քննադատո՞ւմ եք 2008 թ. իշխանություններին, Ռազմիկ Զոհրաբյանը նշեց.
«Ես քննադատում եմ և՛ իշխանության, և՛ ընդդիմության պահվածքը: Միակողմանի կռիվ չի լինում, այսինքն՝ կռիվը երկու կողմից է եղել, և երկու կողմից էլ սխալներ կան: Հարկավոր է սխալները չկրկնել և շտկել»:
