«Իհարկե ողջունելի է, որ ԱՄՆ-ը բարձր մակարդակով հայտարարություն է արել հայ օդաչուների մարմինների տարհանման գործողության վերաբերյալ, և ողջունելի է, որ ընդհանրապես զինադադարի կնքումից ի վեր վերջապես համանախագահների արհեստական չեզոք քաղաքականությունը որոշակի ճաքեր է տալիս». այս մասին մեզ հետ զրույցում նշեց ԼՂՀ վարչապետի մամուլի քարտուղար Արտակ Բեգլարյանը:
«Իհարկե, ցանկալի կլիներ, որ մյուս համանախագահ երկրներն էլ նմանատիպ հայտարարություններ անեին կամ ինչ-որ ձևով ողջունեին, սակայն հենց նրանց լռությունը նշանակում է, որ համաձայն են եղել: Հիշեցնեմ, որ նոյեմբերի 19-ին հայտարարությամբ հանդես եկան ԵԱՀԿ Մինսկի խմբի համանախագահները և իրենց հիասթափությունը հայտնեցին Ադրբեջանի քաղաքականության առթիվ, որը թույլ չի տալիս ուղղաթիռի անկման վայրում հետաքննություն անցկացնել: Սա իր տողատակում ենթադրում էր, որ Մինսկի խմբի համանախագահները դեմ չեն օդաչուների մարմինները դուրս բերելու այլ գործողություններին»,- ասաց նա:
Անդրադառնալով ԵԱՀԿ Մինսկի խմբի գործունեության նպատակահարմարությունը կասկածի տակ դնող տեսակետներին՝ Արտակ Բեգլարյանն ասաց. «Այդ հարցում պետք է զգույշ լինել, քանի որ Ադրբեջանի քաղաքականության նպատակներից մեկն էլ հենց դա էր, որ մեր մեջ էլ կասկածներ առաջանան Մինսկի խմբի ձևաչափի նկատմամբ: Մենք գիտենք, որ տարիներ շարունակ Ադրբեջանը պնդում է, թե Մինսկի խումբն արդյունավետ չէ, պետք է հարցը տեղափոխել ՄԱԿ-ի շրջանակներ: Իսկ մենք և միջազգային հանրությունը պնդում ենք, որ Մինսկի խումբն առկա հնարավոր տարբերակներից ամենաարդյունավետն է: Իհարկե, արդյունավետ չէ մեր ցանկությունների կամ վերջին դեպքերի կտրվածքով, բայց մենք պետք է հասկանանք, որ Ադրբեջանը իր գործողություններով նաև նպատակ ունի Մինսկի խմբի ձևաչափը հեղինակազրկել հայության աչքում:
Պետք է հասկանանք, որ Մինսկի խումբը փորձառություն ունի, տասնյակ տարիներ աշխատում է, և խնդիրը ոչ թե այդ ձևաչափն է, այլ Ադրբեջանը: Մենք այդ առումով այլընտրանք չունենք»: