Ֆրանսիայում ոստիկանները ձերբակալել են բասկյան ETA ահաբեկչական կազմակերպության երկու ենթադրյալ անդամների, որոնցից մեկը Իսպանիայում պատկանում է ամենաշատ հետախուզվող ահաբեկիչների թվին, հաղորդում է La Razon պարբերականը:
Պարբերականի տեղեկություններով` ձերբակալությունը կատարվել է Ֆրանսիայի կենտրոնական մասում` Բուրգունդիայի շրջանում: Ոստիկանության աշխատակիցները մայրուղում կանգնեցրել են մի մեքենա, որը նրանց կասկածելի է թվացել: Ավտոմեքենայում գտնվող երկու տղամարդիկ փորձել են փախուստի դիմել և ձերբակալվել են: Նրանցից մեկը զինված է եղել:
Agnece France-Presse-ի տեղեկատվության համաձայն` ավտոմեքենան խուզարկելու ժամանակ ոստիկանները հայտնաբերել են գերմանական, իտալական, իսպանական կեղծ անձնագրեր: Renault Clio մակնիշի ավտոմեքենան գողացված է եղել:
Europa Press գործակալության փոխանցմամբ` ձերբակալվածներից մեկը եղել է ETA ահաբեկչական կազմակերպության անդամ Անդոնի Լարիս Բուսթունդին: Երկրորդ ձերբակալվածի անձն առայժմ պարզված չէ:
Վերջին մի քանի տարիներին Իսպանիայի իրավապահ մարմինները փաստացիորեն վնասազերծել են կազմակերպությունը. ոստիկանությունը ձերբակալել է ավազակախմբի տասնյակ առանցքային անդամների, առգրավել ավելի քան 2 տոննա պայթուցիկ նյութ, զգալի քանակությամբ զենք, թմրանյութ: