Ինչպես տեղեկացրել էինք, նոյեմբերի 11-13-ը Մայր Աթոռ Սուրբ Էջմիածնում գումարված Հայաստանյայց Առաքելական Ս. եկեղեցու Եպիսկոպոսաց հերթական ժողովին մասնակցած 61 արքեպիսկոպոսների և եպիսկոպոսների շարքում ներկա չէին Երուսաղեմի Հայոց պատրիարքության ներկայացուցիչները: Պատճառը Երուսաղեմի պատրիարքության կողմից ներկայացված եպիսկոպոս ձեռնադրելու երկու թեկնածուներից մեկին՝ Պարետ Ծ. վարդապետի Երիցյանին Վեհափառի մերժումն էր՝ առանց բացատրության:
Հայոց կաթողիկոսի մերժողական նամակը տարակուսանք է առաջացրել Երուսաղեմի միաբանության մեջ, քանի որ երկար տարիներ Պարետ վարդապետը ծառայել է Էջմիածնական թեմերում՝ Կալիֆոռնիայում, Կանադայում, և վայելում է հարգանք ու վստահություն:
Պարետ Ծ. վարդապետը նամակ էր ուղղել Վեհափառին. «Վեհափառ Տէր, կարդացի Ձեր նամակը ուղղուած Ամենապատիւ Տ. Նուրհան Արք. Մանուկեանին, Պատրիարքին Հայոց Երուսաղէմի, որուն մէջ կը յայտնէք ձեռնպահութիւն իմ եպիսկոպոսական ձեռնադրութեան մասին, առարկելով «վերապահումներ կան»: Նկատի առնելով հարցին լրջութիւնը, իմ արժանապատւութիւնը եւ Միաբանական ժողովին որոշումը, իմ արժանաւորութիւնը հաստատող գաղտնի քուէարկութեամբ Միաբանութեանս Ընդհանուր ժողովին կողմէ, կու գամ Ձերդ Վեհափառութենէն խնդրել, եթէ հոս պահանջք բառը զօրաւոր է, անհրաժեշտ հարթումը կատարել արտայայտուած առարկութիւնները անհատներու կողմէ գրաւոր եւ ստորագրուած իրենց կողմէ ինձ եւ Միաբանութեանս ներկայացնելու, եւ ես պատրաստ եմ զանոնք նոյնիսկ հրատարակել թէկուզ իմ մասին: Այլապէս չեմ ընդունիր ոեւէ «վերապահում» առանց գրաւոր փաստի: Ուրիշ՝ ոչինչ»:
Երուսաղեմի Հայոց պատրիարքության էկումենիկ և արտաքին հարաբերությունների բաժնի տնօրեն, պատրիարքության պաշտոնական մամուլի խոսնակ Արիս արքեպիսկոպոս Շիրվանյանը «Առաջին լրատվական»-ի հետ զրույցում նշեց, որ երեկ Երուսաղեմի Հայոց պատրիարքությունը նամակ է ստացել Վեհափառից։ Նամակում Վեհափառը Երուսաղեմի պատրիարքին հրավիրել է Մայր Աթոռ Սուրբ Էջմիածին՝ առկա հարցերը քննարկելու համար:
Արիս սրբազանը նշեց, որ հիմնավորում, թե ինչու է Վեհափառը մերժել Երուսաղեմի պատրիարքության կողմից ներկայացված եպիսկոպոս ձեռնադրելու երկու թեկնածուներից մեկին՝ Պարետ Ծ. Վարդապետի Երիցյանին, նամակում չի նշվել:
Սրբազանը նաև տեղեկացրեց, որ վաղն առավոտյան Երուսաղեմի Հայոց պատրիարք Նուրհան արքեպիսկոպոս Մանուկյանը մեկնում է ԱՄՆ հանգստանալու, ինչպես նաև աշխատանքային այցով և մեկ ամիս կմնա այնտեղ: Այնպես որ, Վեհափառի պատասխան նամակը, ըստ ամենայնի, մեկ ամսով կհետաձգվի: