100 տոկոս համամասնական ընտրակարգի անցնելու վերաբերյալ ոչիշխանական ուժերի պահանջը քննարկելու պատրաստակամության մասին Հովիկ Աբրահամյանի հայտարարությունը կրկին թարմացրել է իշխանություններ-ոչիշխանական ուժեր բանակցությունների թեման: ԲՀԿ-ից Միքայել Մելքումյանը հայտարարել է, որ բանակցությունների պաշտոնական հրավեր չկա, և եթե լինի, ապա կմտածեն պատասխանի մասին: ՀՀԿ-ի խորհրդարանական խմբակցության ղեկավար Վահրամ Բաղդասարյանն էլ ասել է, որ պատրաստ են քննարկել հարցը, սակայն ընտրական օրենսգրքում փոփոխություններ կատարել չեն ցանկանում, համենայն դեպս՝ սահմանադրական փոփոխություններից առաջ:
Այդ ընթացքում Նիկոլ Փաշինյանը պատրաստել է խորհրդարանում Սերժ Սարգսյանի իմպիչմենտի նախաձեռնություն՝ խորհրդարանական ոչիշխանական ուժերին առաջարկելով միանալ այդ նախաձեռնությանը: Ոչիշխանական ուժերն առայժմ չեն կողմնորոշվել, թեև նախնական արձագանքները հիմք են տալիս ասելու, որ նրանք Փաշինյանի նախաձեռնությանը ամենայն հավանականությամբ չեն միանա: Բացառված չէ, որ Հովիկ Աբրահամյանի հայտարարությունը՝ համամասնական 100 տոկոս ընտրակարգի անցնելու հարցը քննարկելու պատրաստակամության մասին, հնչել է իմպիչմենտի նախաձեռնությունից ոչիշխանական ուժերին այսպես ասած փրկելու համար, քանի որ նրանք ըստ էության կարող են հրաժարվելու քիչ թե շատ քաղաքական փաստարկ բերել, որ իշխանությունները ընդառաջ են գնում իրենց պահանջին, և իրենք ի սկզբանե անհեռանկար նախաձեռնության փոխարեն կկենտրոնանան կոնկրետ խնդիրների վրա:
100 տոկոս համամասնականի շուրջ քննարկումների թեմայի ակտիվացումը կարող է, այսպես ասած, «լուրջ» պատրվակ դիտվել Նիկոլ Փաշինյանի նախաձեռնությունից ձեռք քաշելու համար: Այսինքն՝ Հովիկ Աբրահամյանը իր, այսպես ասած, երախտագիտությունն է հայտնում ոչիշխանական ուժերին, որոնք ապրիլից ի վեր բավական հետևողականորեն քայլեր են կատարում Աբրահամյանին ներքաղաքական քննադատության թիրախից զերծ պահելու համար և ըստ էության կարողանում են լուծել այդ խնդիրը: Սրանով էլ իր խնդիրները առնվազն մինչև փետրվար-մարտ կարծես թե լուծում է Սերժ Սարգսյանը, որն այդ ժամանակաշրջանում պատրաստվում է իր կարծիքը հայտնել սահմանադրական փոփոխությունների հայեցակարգի մասին:
Սերժ Սարգսյանը, հայտարարելով 12 կետերին վերադառնալու մասին, ըստ էության դաշտ ստեղծեց Հովիկ Աբրահամյանի և ոչիշխանական ուժերի կամ ի մասնավորի՝ ԲՀԿ-ի միջև «փոխանցումներով» խաղի կամ «պինգ-պոնգի» համար: Ըստ որում՝ Սարգսյանի համար կարևոր չէ խաղի կոշտ բնույթը: Ավելին՝ նա գուցե հաշվարկել էր, որ Աբրահամյանն ու Ծառուկյանը խաղալու են ժամանակի վրա, ինչն էլ Սերժ Սարգսյանին պետք է ժամանակ շահելու համար:
Մյուս կողմից՝ Գագիկ Ծառուկյանն է հայտարարում, որ ժամանակը աշխատում է իրենց օգտին: Թե ինչ նկատի ունի Ծառուկյանը՝ պարզ չէ, սակայն միանշանակ է, որ բոլորի հույսը ժամանակն է, և բոլորը համարում են, որ ժամանակը իրենք են շահում: Հստակ է միայն, թե ով է կորցնում, այսինքն՝ ում օգտին չի աշխատում ժամանակը. պետության ու հասարակության:
