Channel Four News բրիտանական հեռուստաալիքի լրագրող Քրիշնան Գուրու-Մերֆին կինոռեժիսոր Քվենթին Տարանտինոյին բարկացրել է նրա ֆիլմերում դաժանության տեսարանների և նմանատիպ ֆիլմերի ու առօրյա կյանքում բռնության կապի մասին հարցով: Հարցազրույցի տեսագրությունը հրապարակվել է Channel Four-ի կայքում:
Գուրու-Մերֆիի և Տարանտինոյի հարցազրույցը նվիրված է եղել ռեժիսորի «Ջանգո ազատագրում» ֆիլմի Մեծ Բրիտանիայում պրեմերային:
Լրագրողը հարցրել է ռեժիսորին, թե ինչու է նա այդքան վստահ, որ ֆիլմերում սպանության տեսարանների դիտելու և իրականում սպանելու հաճույքների միջև ընդհանրապես կապ չկա:
Տարանտինոն հայտարարել է, որ չի պատասխանի այդ հարցին և չի պատրաստվում պարել նրա՝ լրագրողի դուդուկի տակ:
«Ես ձեր ստրուկը չեմ, և դուք իմ տերը չեք»,- ասել է ռեժիսորը:
Քվենտին Տարանտինոն հավելել է, որ չի ցանկանում խոսել այն մասին, ինչ հետաքրքրում է լրագրողներին, քանի որ ինքը եկել է հարցազրույցի, որպեսզի լավ վաճառի իր ֆիլմը:
«Սա ֆիլմի գովազդ է, ուրիշ բանի հետ մի շփոթեք»,- բնութագրել է Տարանտինոն Channel Four News-ին տված հարցազրույցը:
«Դա ձեր գործը չէ, թե ինչ եմ ես կարծում: Ես պարտավոր չեմ ձեզ բացատրել այն, ինչը չեմ ցանկանում բացատրել»,- ասել է ռեժիսորը, երբ լրագրողը այնուամենայնիվ փորձել է նրան վերադարձնել այդ հարցին: Նա հավելել է, որ բազմիցս է պատասխանել նմանատիպ հարցերի և չի պատրաստվում իր կարծիքը կրկին հայտնել:
The Daily Telegraph-ին տված հարցազրույցում Գուրու-Մերֆին հայտարարել է, որ զարմացել է Տարանտինոյի արձագանքից իր բավական նուրբ հարցին:
