ՀՀ նախագահի տոնական անորոշ շնորհավորանքը չի նպաստել հետտոնական պոզիտիվ սպասումներին: Այսօր լրագրողների հետ հանդիպման ժամանակ այս մասին ասաց ԵՊՀ սոցիոլոգիայի ամբիոնի վարիչ Արթուր Աթանեսյանը՝ անդրադառնալով ՀՀ նախագահի` ամանորյա գիշերը հղած տոնական շնորհավորանքին:
Ըստ նրա՝ հետտոնական տրամադրությունները ուղղակիորեն կապված են մարդկանց կորցրած ֆինանսական միջոցներով, ինչպես նաև երկրի համար անկյունաքարային լիդերների, աստղերի շնորհավորանքներով, որոնք որոշակիորեն ծրագրավորում են մարդկանց:
«Ես համեմատեցի ՀՀ նախագահի և ՌԴ նախագահի շնորհավորական ուղերձները: ՀՀ նախագահի շնորհավորական ուղերձն անորոշ ուղղությամբ էր, ասաց` «թող լինի լավ, թող լինի երջանիկ», սակայն հարցն այն է, թե ում է դիմում` ասելով «թող լինի»:
Ի տարբերություն նրա՝ ՌԴ նախագահը ներկայացնում էր իր աշխատանքը, ասում, որ կանի: Այս իմաստով բնակչության սպասելիքներն ավելի հստակ են, ավելի պոզիտիվ տրամադրություններ են հաղորդվում մարդկանց: Սա պետք է հուշում լինի նախագահների հետ աշխատող մարդկանց համար, քանի որ ՀՀ նախագահի ուղերձում թերացում կար, որը չի նպաստել հետտոնական պոզիտիվ սպասումներին»,- մեկնաբանեց նա:
Վերջինս հավելեց, որ տոները քաղաքականացված չէին, ինչը նա դրական երևույթ համարեց:
