Հայաստանի ազգային հավաքականի կիսապաշտպան Հենրիխ Մխիթարյանը երեկ ծավալուն հարցազրույց էր տվել «Սպորտ Էքսպրես»-ին: Այսօր հրապարակվել է հարցազրույցի երկրորդ հատվածը:
«Ես շատ հասարակ մարդ եմ, ինչպես 5, 7 տարի առաջ: Խոսակցություններ կային, իբր հրաժարվում եմ շփվել երկրպագուների հետ, տառապում եմ աստղային հիվանդությամբ… բոլորին դուր գալ հնարավոր չէ: Այդ մարդիկ կարող են հորինել ցանկացած պատմություն, որը հեռու է իրականությունից: Մարդիկ, որոնք ինձ ճանաչում են, կփաստեն, որ ես որպես մարդ չեմ փոխվել «Շախտյոր» տեղափոխությունից, Հայաստանի լավագույն խաղացող ճանաչվելուց, և այժմ էլ, ԱՊՀ լավագույն խաղացող դառնալուց հետո: Ես քաջ գիտակցում եմ՝ ինչ է աստղային հիվանդությունը: Այն ճանապարհ է դեպի անդունդը:
Դոնեցկի «Մետալուրգ» տեղափոխությունից առաջ վստահ էի, որ այն ինձ մեծ օգուտ կտա, քանի որ թիմը գլխավորում էր Նիկոլայ Կոստովը: Մինչ այդ նա աշխատել էր «Բանանց»-ում, և ես լավ էի ճանաչում նրան: Մեծ դեր ունեցավ նաև այն, որ «Մետալուրգ»-ի սեփականատերերն իմ հայրենակիցներն էին:
«Շախտյոր» տեղափոխությունից առաջ «Տոտենհեմ»-ի և «Վերդեր»-ի՝ իմ ծառայություններով հետաքրքրված լւնելու մասին ծանոթացել եմ մամուլից, բայց պաշտոնական առաջարկ չեմ ստացել, ի տարբերություն «Շախտյոր»-ի: Այս տեղափոխության համար վայրկյան անգամ չեմ ափսոսել: «Շախտյոր»-ը մեծ ակումբ է: Եթե առաջարկ ստանամ «Բարսելոնա»-ից, «Ռեալ»-ից կամ «Մանչեսթեր Յունայթեդ»-ից, չեմ կարող ասել, թե որը կընտրեմ: Այդ մասին չեմ մտածել, բայց հստակ կարող եմ ասել, որ կմերժեմ ռուսական ակումբների առաջարկը, քանի որ մտածում եմ միայն «Շախտյոր»-ում ելույթներիս մասին:
