Երկրաշարժից հետո մինչև 1000 մարմին գտնվում են տարհանման գոտում, որտեղ անչափ բարձր է ճառագայթման մակարդակը: Այս մասին հաղորդում են Ճապոնիայի իշխանությունները: Մարմինները դուրս չեն բերվում, քանի որ մտահոգություն կա, որ դրանք ռադիացված են: Այս մասին հաղորդում է Kyodo գործակալությունը:
Ոստիկանությունից հայտնել են, որ նախկինում իշխանությունները մտադրվել էին դուրս բերել մարմինները, սակայն հետագայում հրաժարվել են այդ մտքից: Ատոմակայնից 5 կիլոմետր հեռավորության վրա հայտնաբերվել էր մարմին, որի ճառագայթման մակարդակն անչափ մեծ է եղել:
Մինչդեռ Միացյալ նահանգների և Ճապոնիայի զինված ուժերը ապրիլի 1-ից սկսում են համատեղ մեծածավալ որոնողական աշխատանքներ, որոնց նպատակն է հայտնաբերել մարտի 11-ի երկրաշարժից և ցունամիից հետո կորածներին: Այդ աշխատանքներին մասնակցում են մինչև 18 հազար ճապոնացի և 7 հազար ամերիկացի զինվորականներ: Աշխատանքներում ներգրավվել են նաև 100 ճապոնական ռազմական ինքնաթիռներ, 50 նավեր, ամերիկացիները տրամադրել են 20 ինքնաթիռ և 15 նավ:
Այս գործողությունները պետք է համընկնեն գարնանային մակընթացության հետ: Տեղատվության ժամանակ փրկարարներին կհաջողվի հասնել այնպիսի վայրեր, որոնք մինչ հիմա գտնվում էին ջրի տակ: Որոնողական աշխատանքները չեն անցկացվում «Ֆուկուսիմա- 1» ատոմակայնից 30 կմ հեռավորության վրա:
