Նյու Յորքում բողոքի ակցիաներ են սկսվել՝ ընդդեմ Ֆերգյուսոնում սևամորթ դեհահաս Մայքլ Բրաունին սպանած ոստիկան Դարեն Ուիլսոնին արդարացնելու երդվյալ ատենակալների վճռի: Բողոքողները փակել են Թրայբորո կամուրջը՝ հաղորդվում է PzFeed-ի Twitter-ում:
Ակցիաներ են անցկացվում նաև Չիկագոյում, Սիեթլում, Բոստոնում և Լոս Անջելեսում՝ հայտնում է Reuters-ը:
Ֆերգյուսոնում շարունակվում են ոստիկանության և ցուցարարների միջև բախումները: Քաղաքում լսվում են հրաձգության ձայներ: Բողոքողները այրել են մի քանի ավտոմեքենա, որոնցից մեկը՝ ոստիկանական:
Սենթ Լուիս շրջանի Յունիվերսիթի Սիթիում ոստիկանության սպան ստացել է ձեռքի հրազենային վնասվածք և հոսպիտալացվել: Ներկայումս պարզվում է՝ արդյոք այդ դեպքը կապվա՞ծ է անկարգությունների հետ:
Ավելի վաղ ԱՄՆ քաղավիացիայի դաշնային վարչությունը Ֆերգյուսոնում ոչ թռիչքային գոտու ռեժիմ է սահմանել: Բացի դրանից՝ որոշ ժամանակով դադարեցվել է Սենթ Լուիսի օդանավակայանի աշխատանքը:
Նոյեմբերի 24-ին Ֆերգյուսոնում երդվյալ ատենակալները վճռել են մեղադրանք չառաջադրել Դարեն Ուիլսոնի դեմ:
