«Ես պահանջում եմ, որպեսզի ազատամարտիկ Մարտիրոս Աճեմյանի հարցը մտնի եռյակ քաղաքական ուժերի օրակարգ, և լուծում տրվի դրան»,- «Առաջին լրատվական»-ի հետ զրույցում ասաց հոկտեմբերի 24-ին եռյակի հանրահավաքից հետո կայացած երթի ժամանակ ձերբակալված, ապա կալանավորված ազատամարտիկ Մարտիրոս Աճեմյանի հարազատներից Աննա Արզումանյանը:
Նա Աճեմյանի կալանավորումից հետո բազմիցս դիմել է ԲՀԿ-ին, ՀԱԿ-ին՝ խնդրելով օգնել ազատամարտիկին, որպեսզի հանիրավի քրեական գործ չհարուցվի, բայց առանձնապես արդյունքի չի հասել: ԲՀԿ-ից պատճառաբանել են, թե նա երթի մասնակից չի եղել, սովորական անցորդ է եղել ու եթե հարվածել է ոստիկանին, ապա պետք է պատասխանատվություն կրի: Գրեթե նույն պատասխանը եղել է նաև ՀԱԿ-ի կողմից: Եվ միայն երկար խնդրանքերից հետո է ՀԱԿ-ը փաստաբան տրամադրել:
Հիշեցնենք, որ դեպքը տեղի էր ունեցել, ինչպես արդեն նշեցինք, երթի ժամանակ: Ամիրյան-Զաքյան փողոցների խաչմերուկում, կանգառի մոտակայքում, ոստիկանի և Մարտիրոս Աճեմյանի միջև միջադեպ էր տեղի ունեցել, որը վերաճել է քաշքշուկի, որից հետո ազատամարտիկը ձերբակալվել և կալանավորվել էր՝ պատճառաբանությամբ, թե հարվածել է ոստիկանի աչքին: Փաստի առիթով հարուցվել է քրեական գործ, իսկ Աճեմյանին մեղադրանք է առաջադրվել Քրեական օրենսգրքի 316 հոդվածի 1-ին մասով:
Ներկա պահին գործով նախաքննություն է ընթանում: Առերեսումներն ավարտվել են, առկա են նաև դեպքից հետո նշանակված դատաբժշկական փորձաքննության արդյունքները, ըստ որոնց՝ ոստիկանի դեմքին մարմնական վնասվածք բնորոշող վնասվածքներ, հետքեր չեն հայտնաբերվել:
Աննայի խոսքով, նա այս ընթացքում կարողացել է պարզել, թե ինչպես է եղել դեպքն իրականում: Հոկտեմբերի 23-ին Մարտիրոսը, վերադառնալով Գերմանիայից, հաջորդ օրը մասնակցել է հանրահավաքին ու երթին: Նա հանգիստ քայլել է երթի մեջ, մարդկանց հոսքը մեծ է եղել, հետևից հրմշտոցի ալիք է եղել, որը փոխանցվել է առաջ: Մարտիրոսը խնդրել է, որ չհրեն, բայց հրմշտոցը շարունակվել է, և մի կին է ընկել, որին էլ նա կռացել է, որ բարձրացնի: Մարտիրոսը նորից է հորդորել, որ չհրեն, և ինչ-որ մարդկանց հետ լեզվակռվի մեջ է մտել, որի ընթացքում կարմիր վերնաշապիկով մեկը մոտեցել է, քաշել նրա թևից ու ասել, թե իր ինչ գործն է, ինքն ո՞վ է, որ ասում է՝ չհրեն: Դրանից հետո այդ մարդը հեռանում է, բայց հենց նույն պահին ոստիկանները բռնում են նրա թևերից և ասում, որ հարվածել է ոստիկանի աչքին:
Պարզաբանումներից հետո ոստիկանները Մարտիրոսին բաց են թողնում: Նա շարունակում է իր երթը, սակայն արդեն Թումանյան փողոցում նրան կրկին ոստիկաններ են մոտենում և հրավիրում բաժին, որտեղ էլ պարզվում է, որ նա բռունցքով հարվածել է ոստիկանի աչքին ու մարմնական վնասվածք հասցրել նրան: Իրավապահները, սակայն, մինչ օրս չեն կարողանում հայտնաբերել կարմիր վերնաշապիկով անձին, որից պարզ կդառնա, թե նա ով է եղել և ինչու է հրահրել այդ վեճը: Ուշագրավ է նաև, որ գործով հարցաքննված ոստիկանները եւս հակասական ցուցմունքներ են տվել: Մեկն ասել է, թե տեսել է՝ ոնց է խփել, մյուսը՝ թե չի տեսել, մեկն ասել է՝ բռունցքով է խփել, մյուսը՝ ապտակել է:
Աննան պարզաբանեց նաև, որ Մարտիրոս Աճեմյանը ոչ թե մեկ ամիս առաջ էր ազատվել բանտից, այլ մեկ տարի առաջ և մեկնել էր Գերմանիա:
Նշենք, որ Աճեմյանը 15 տարվա ազատազրկման է դատապարտվել հոկտեմբերի 27-ի գործով կարևորագույն վկա Սամվել Առաքելյանի սպանության համար: Այդ գործով մինչև հիմա ազատազրկված է նաև Արթուր Այվազյանը՝ Մանախ մականունով: Նա էլ՝ որպես այդ սպանության պատվիրատու: Երկուսն էլ, սակայն, մինչ օրս չեն ընդունել իրենց մեղավորությունը կատարվածում: «Այն, որ նա դատապարտվել է սպանության հոդվածով, դեռ չի բնորոշում նրան, և չի կարելի նոր գործ սարքել»,- եզրափակեց Աննան:
