Վրացական Interpressnews.ge կայքի փոխանցմամբ, Վրաստանում անցկացված դատաբժշկական փորձաքննության արդյունքները վկայել են այն մասին, որ 2010 թվականին վրացական բանտերում մահացածների 32 տոկոսի (այսինքն` յուրաքանչյուր 3-րդ մահացած բանտարկյալի) մոտ հայտնաբերվել են այս կամ այն աստիճանի մարմնական վնասվածքներ:
Փորձաքննությունը ցույց է տվել, որ այդ մարմնական վնասվածքները կրել են թեթև բնույթ և չէին կարող մահվան պատճառ հանդիսանալ, ինչը, սակայն, մեծ կասկածանքների տեղիք է տվել:
Նշվում է, որ նախորդ տարի, 2009 թվականի համեմատ, բանտարկյալների մահացության դեպքերն աճել են 50 տոկոսով:
Հիշեցնենք, որ անցյալ տարվա ամռանը Վրաստանի նախագահ Միխեիլ Սաակաշվիլին հայտարարել էր, որ «վարդերի» հեղափոխությունից հետո վրացական բանտերում 3-4 անգամով ավելացել է բանտարկյալների քանակը:
