Եթե Գագիկ Ծառուկյանը չառաջադրվեց, երևի պատրաստ չէր կորցնել այն, ինչ տրված էր իրեն Աստծո կողմից. այսօր լրագրողների հետ հանդիպման ժամանակ այս մասին ասաց Ազգային համաձայնություն կուսակցությունից ՀՀ նախագահի թեկնածու Արամ Հարությունյանը:
Բանախոսը նշեց, որ իր համար անհասկանալի է, թե ինչու ԱԺ ընտրությունների արդյունքում բավական շատ ձայներ ստացած կուսակցությունները թեկնածու չառաջադրեցին գալիք նախագահական ընտրություններում: Նա հիշեց, որ ԲՀԿ առաջնորդ Գագիկ Ծառուկյանն ասում էր, թե պատրաստ է կորցնել ամեն ինչ (ենթադրում է նաև հարստությունը): Ուստի, նրա խոսքով, եթե չառաջադրվեց, ուրեմն պատրաստ չէր կորցնել, այն ինչ տրված էր իրեն Աստծո կողմից:
Արամ Հարությունյանի կարծիքով՝ ՀԱԿ-ը, ԲՀԿ-ն, ՀՅԴ-ն պատասխանատվություն ունեն ժողովրդի առջև, ուստի դերակատարություն ունեցող ուժերը պետք է հավաքվեն և այս իրավիճակից փորձեն դուրս գալ, չպետք է քաղաքացուն թողնեն միայնակ: Ըստ նրա՝ առանց այն էլ քաղաքացին միայնակ է: «Այնպես որ, իմ համար անհասկանալի է: Հարգում եմ բոլոր կուսակցությունների որոշումը, բայց ես չունեմ հարցի պատասխանը, թե ինչ են որոշել անել:
Ես բոլոր թեկնածուներին առաջարկում եմ օրենքով սահմանված ժամկետում հանել թեկնածությունները՝ գործող նախագահին միայնակ թողնելով»,- առաջարկեց բանախոսը՝ վստահեցնելով, որ ՀՀ գործող նախագահը 50% ձայն չի ստանա:
Արամ Հարությունյանի կարծիքով՝ այս ընտրություններն այնքանով են տարբերովում մյուս ընտրություններից, որ կեղծ ժողովրդավար թեկնածուները, ովքեր հիմա «Հանրապետականի պադվալում վարձով են մնում», չկան այս ընտրություններին: ՀՀ նախագահի թեկնածուն հարցրեց. «Ո՞ւր են այսօր Վազգեն Մանուկյանը, Արտաշես Գեղամյանը: Անսկզբունքային մարդիկ, որոնք իրենց կոտորում էին»:
Անդրադառնալով իր կարգախոսներին՝ նա տեղեկացրեց, որ տարբեր կարգախոսներով է հանդես գալու: Նա ներկայացրեց, որ կարգախոսներից մեկն է «Հանուն հավերժական Հայաստանի», մյուսը՝ «Ես ձեզնից մեկն եմ»: ՀՀ նախագահի թեկնածուն չբացառեց, որ քարոզարշավի ընթացքում այլ կարգախոսներ էլ կասի:
Խոսելով նախագահական ընտրությունների երկրորդ փուլի հավանականությունից՝ նաասաց, որ երկրորդ փուլ հաստատ պետք է լինի: «Ո՞ւմ պետք է ձայն տա ՀԱԿ-ի, ԲՀԿ-ի հիմնական էլեկտորատը, պետք է բաժանվի ընդդիմադիրների միջև: Եթե երկրորդ փուլ լինի, կկանգնեմ նրա կողքին, ով դուրս կգա Սերժ Սարգսյանի դեմ»,-ասաց Արամ Հարությունյանը:
Անդրադառնալով ՀՀ նախագահի թեկնածու Րաֆֆի Հովհաննիսյանի դիտարկմանը, թե գալիք ընտրությունները լինելու են Սերժի և Րաֆֆիի Հայաստանների պայքար՝ հարցով դիմեց. «Որտե՞ղ է լինելու Թևան Պողոսյանը՝ Րաֆֆո՞ւ, թե՞ Սերժի Հայաստանում»:
