Ազգային ժողովը երեկ շարունակեց քննարկել և հավանաբար երկուշաբթի օրը սկսվող արտահերթ նիստում կընդունի կառավարության՝ «Կառավարության կառուցվածքի մասին» օրինագիծը: Նախագիծը, հիշեցնենք, նախատեսում է Արտակարգ իրավիճակների նախարարությունը միացնել Տարածքային կառավարման նախարարությանը և ստեղծել նոր՝ Միջազգային տնտեսական ինտեգրման և բարեփոխումների նախարարություն:
Իշխանության ներկայացուցիչները բացատրում են, որ կառուցվածքային այս փոփոխությունը տնտեսական իրողությունների պատճառով են նախաձեռնել: Առաջին դեպքում ցանկանում են օպտիմալացնել հնարավորությունները, իսկ երկրորդ դեպքում նոր նախարարություն են ստեղծում, որը պետք է համակարգի Հայաստանի արտաքին տնտեսական քաղաքականությունը: Այս փոփոխությունների իրական նպատակը, սակայն, այնքան էլ ներկայացված բացատրությունը չէ:
Գարնանը երբ Տիգրան Սարգսյանը հրաժարական տվեց, ու նրա հետ հրաժարական տվեցին նրա թիմի անդամները, կառավարությունում մնաց միայն Վաչե Գաբրիելյանը: Այն ժամանակ տեղեկություններ շրջանառվեցին, թե նորանշանակ վարչապետ Հովիկ Աբրահամյանի թիմում չկա մեկը, ով կարողանա համակարգել միջազգային կառույցների հետ աշխատանքները կամ Եվրասիական տնտեսական միությանն անդամագրվելու գործընթացը: Եվ որ Սերժ Սարգսյանը նրան թույլ չի տվել հրաժարական տալ, որպեսզի համակարգի այդ ոլորտները: Դեռևս այն ժամանակ էլ տեղեկություններ էին շրջանառվում, որ հատուկ Վ. Գաբրիելյանի համար նոր նախարարություն է ստեղծվելու, և որ այն լինելու է բարեփոխումների նախարարություն: Ահա այդ խոսակցություններից յոթ ամիս անց ստեղծվում է Միջազգային տնտեսական ինտեգրման և բարեփոխումների նախարարություն, որը ղեկավարելու է Վ. Գաբրիելյանը:
Շաբաթներ առաջ հրաժարական տվեց փոխվարչապետ և տարածքային կառավարման նախարար Արմեն Գևորգյանը, և նրա զբաղեցրած պաշտոնները մինչև այժմ թափուր են: Վերջերս մամուլում տեղեկություններ շրջանառվեցին, թե ոչ իշխանական ուժերից առանձնացած և իշխանությունների նախաձեռնած սահմանադրական փոփոխությունները պաշտպանող Դաշնակցություն կուսակցությունը հնարավոր է պաշտոններ ստանա: Եվ որ փոխվարչապետի ու ՏԿ նախարարի պաշտոնները նրանց են տալու: Մասնավորապես՝ գյուղատնտեսության նախկին նախարար Դավիթ Լոքյանին: Սակայն այդ համագործակցությունը չկայացավ: Ասում են, թե ՀՅԴ-ում միակարծիք չեն Հանրապետականի հետ պաշտոնները կիսելու հարցում: ՀՅԴ-ի գաղափարական հատվածը դեմ է եղել պաշտոններ ստանալուն, իսկ նախկին պաշտոնյաները ձգտել են դրան: Ի վերջո, այդ կուսակցությունում հաղթել է, այսպես ասած, գաղափարական հատվածը:
Եվ հիմա վերը նշված երկու պաշտոններն էլ մնում են իշխանական մեծամասնությանը: ՀՀԿ-ն փոխվարչապետի պաշտոնում ամենայն հավանականությամբ կնշանակի Վ. Գաբրիելյանին: ԵՏՄ-ում կա փոխվարչապետների կառույց, որն էլ հիմնականում համակարգում է այդ միության աշխատանքները: Այսինքն` միջազգային տնտեսական քաղաքականությունը և ներտնտեսական, այսպես ասած, բարեփոխումները նա է համակարգելու:
Ինչ վերաբերում է ՏԿ նախարարությանը, ապա իշխանական կուլիսներում վստահեցնում են, որ նախարար է նշանակվելու այդ կառույցի մեջ ընդգրկվող՝ Արտակարգ իրավիճակների նախարարության ղեկավար Արմեն Երիցյանը: Վերջինս մի քանի օր առաջ մեզ հետ զրույցում ասել էր, որ եթե իրեն առաջարկեն այդ պաշտոնը, ինքը կընդունի: Փաստորեն, ՏԿ նախարարն էլ լինելու է Ս. Սարգսյանի ամենավստահելի պաշտոնյաներից մեկը: Ընդ որում` այս նշանակումն էլ պատահական չի լինի և ունի իր հատուկ նպատակները:
Բանն այն է, որ այդ գերատեսչությունն է համակարգում տեղական ինքնակառավարման մամինների՝ մարզպետարանների ու քաղաքապետարանների և դրանց միջոցով գյուղապետարանների աշխատանքները: Իսկ տվյալ դեպքում իշխանություններին այդ մարմինների ոչ թե բուն աշխատանքն է հետաքրքրում, այլ ստվերային գործողությունները, որոնք հիմնականում կապված են մարդկանց վրա ազդեցություն ունենալու կամ նրանց մոբիլիզացնելու հետ:
Գաղտնիք չէ, որ ընտրությունների ժամանակ ՏԻ մարմինները մեծ դեր են կատարում իշխանություններին ձայներ ապահովելու համար: Ավելին` հենց մարզպետարանները, ու գյուղապետարաններն են եղել իշխանությունների վերարտադրման հաղթանակն ապահովողը:
Հիշեցնենք, որ 2013թ. նախագահական ընտրություններին Ս. Սարգսյանը պարտվեց գրեթե բոլոր խոշոր քաղաքներում, և նրան ձայն էին ապահովել հիմնականում փոքր քաղաքներն ու գյուղերը:
Եվ ահա, 2017թ. խորհրդարանական և 2018թ. նախագահական ընտրություններին ընդառաջ իշխանությունները փորձում են մարզերում ամրացնել իրենց դիրքերը և այդ կառույցների աշխատանքները համակարգող այնպիսի ղեկավար նշանակել, ով անվերապահ նվիրված կլինի իրենց: Իսկ Ա. Երիցյանն ամբողջությամբ համապատասխանում է այդ նպատակներին:
Ասում են անգամ, որ Ա. Գևորգյանի հրաժարականն այդ պաշտոնից այնքան էլ պատահական չէր,- որքան էլ այն ինքնակամ է եղել, նունքան էլ իշխանությունների դրդմամբ է պայմանավորված եղել,- և որ իշխանությունները ընտրություններին ընդառաջ փորձում են ավելի բյուրեղանալ: Ա. Գևորգյանը մինչև վերջ էլ համարվում էր նախկին նախագահ Ռոբերտ Քոչարյանի կադրը: Իսկ 2017-2018թթ. ընտրությունները կարող են դառնալ իշխանափոխության ընտրություն, հատկապես երբ Ս. Սարգսյանը սպառել է նախագահի պաշտոնում առաջադրվելու հնարավորությունները: Ճիշտ է, նա կփորձի իր համար ժառանգորդ ապահովել, բայց դա չի ունենա նույն սրությունը:
Հատկանշական է, որ Ա. Երիցյանի նշանակմամբ իշխանությունները վարչապետ Հովիկ Աբրահամյանին են հեռու պահում ՏԻ մարմինների վրա ազդեցություն ունենալուց: Մինչև այժմ էլ նա այդ կառույցների վրա ունեցել է որոշակի ազդեցություն. չէ՞ որ ժամանակին ինքն էլ է եղել ՏԻ նախարար: Եվ ահա, ընտրություններին ընդառաջ իշխանությունները վերընտրվելու համար խիստ կարևոր ՏԻ մարմինները կենտրոնացնում են իրենց ձեռքում:
