Սիրիական հակամարտության զոհերի թվի աճը չի փոխել ԱՄՆ-ի դիրքորոշումը Սիրիայում ընդդիմադիր խմբավորումներին ոչ ռազմական օգնություն ցուցաբերելու վերաբերյալ: Ինչպես հաղորդում է Interfax-ը, նման հայտարարությամբ հանդես է եկել ԱՄՆ-ի պետդեպի պաշտոնական ներկայացուցիչ Վիկտորյա Նուլանդը:
Նրա խոսքերով՝ ԱՄՆ-ը շարունակում է հավատալ, որ Սիրիայի վարչակարգի դեմ կիրառվող պատժամիջոցները, ընդդիմությանը ոչ ռազմական օգնություն ցուցաբերելը, Սիրիայում և Սիրիայից դուրս մարդասիրական օգնություն տրամադրելը ներկա պահին ԱՄՆ-ի ճիշտ ուղղությունն է:
«Մենք արդեն շատ անգամ խոսել ենք, երբ քննարկել ենք Եմենը կամ Լիբիան, Եգիպտոսը կամ Սիրիան, որ բոլոր դեպքերում օտարերկրյա օգնությունը սահմանող հանգամանքները տարբեր են»,- նշել է Նուլանդը:
Պատասխանելով այն հարցին, թե արդյոք ԱՄն-ը պատրա՞ստ է ավելի կոշտ միջոցներ ձեռնարկել Սիրիայի հանդեպ այն կապակցությամբ, որ ներսիրիական հակամարտության զոհերի թիվը հասել է 60 հազարի, Նուլանդ պատասխանել է. «Ես չեմ ցանկանում խաղալ թվերով: Այն, ինչ տեղի է ունենում Սիրիայում, սարսափելի ողբերգություն է: Բայց հենց Ասադի վարչակարգն է կրում հիմնական պատասխանատվությունը»:
Նուլանը հավելել է, որ սիրիական խնդրի լուծման լավագույն տարբերակը բռնության դադարեցումը և երկրի նախագահ Բաշար Ալ-Ասադի պաշտոնից հեռանալն են:
