Կենտրոն և Նորք-Մարաշ վարչական շրջանների ընդհանուր իրավասության դատարանում Մեսրոպ Մակյանի նախագահությամբ սկսվեց Բենիամին Մաթևոսյանի գործի դատական քննությունը:
Ամբաստանյալի աթոռին հայտնված 29-ամյա Բենիամինը ՌԴ քաղաքացի է, բնակվել է Սանկտ Պետերբուրգի Լենինսկի պրոսպեկտում:
Նա իր սեփական մեքենայով տաքսի ծառայություն է մատուցել Ռուսաստանի հյուսիսային մայրաքաղաքում:
«Շոֆեր եմ»՝ ասաց Բենիամինը իր աշխատանքի վերաբերյալ դատարանի հարցին:
«Հմի պտի էթամ, որ տաքսի ծառայության մեքենա քշեմ, Հայաստան գալուս ժամանակ իմ մեքենան ծախել եմ: Ուզում էի էստեղ մնամ, բայց չկարեցա…»:
Ընտանեկան վիճակի մասին Բենիամինն ասաց, թե զագսով ամուսնացած չէ, բայց Հայաստան գալու պատճառներից մեկն էլ իր ամուսնությունն է եղել, Սուրբ Գրիգոր Լուսավորիչ եկեղեցում իրենց պսակադրությունն է կատարվել, դրա վկայագիրը ներկայացվեց դատարան:
Բենիամինը հայտնեց, որ կինն արդեն երեք ամսվա հղիություն ունի, ինքն ապրում է երկրորդ խմբի հաշմանդամ հոր, նաև մոր ու տատիկի հետ:
Բենիամինը կալանքի տակ չէ: Նա մեղադրվում է բռնության գործադրմամբ խուլիգանություն կատարելու համար:
Մինչև դատաքննության սկիզբը ամբաստանյալը հայտնեց, թե իրեն լիովին մեղավոր է ճանաչում ու միջնորդում է, որ գործը արագացված ընթացակարգով քննվի:
Մեղադրող Գեղամյանը հրապարակեց մեղադրական եզրակացության եզրափակիչ մասը:
Ըստ մեղադրանքի՝ Բենիամին Մաթևոսյանը 2013 թվականի դեկտեմբերի 5-ի լույս 6-ի գիշերը իր քրոջ, քրոջ ամուսնու հետ գտնվել է Երևանում, Հյուսիսային պողոտա 1 հասցեում գործող «Պալացո դի Լուսսո» կարաոկե-ակումբում:
Ընտանիքով ուրախացել են, Բենիամինը ակտիվորեն պարել է պարահրապարակում: Եվ այնտեղ դիպել կամ խանգարել է նույնպես ակտիվորեն պարող ու բավական անսթափ վիճակում գտնվող, ազգությամբ ռուս Լյուդմիլային:
Լյուդմիլան բարկացել է Բենիամինի հրումից ու սկսել է հայհոյել նրան՝ օգտագործելով ռուսական և օտարալեզու հայհոյանքների իր հարուստ պաշարը:
Բենիամինը պատասխան հայհոյանքներն է տվել: Լյուդմիլան սկսել է հարվածել Բենիամինին, նա էլ ի պատասխան քաշքշել է անսթափ հաճախորդուհուն, ապա վերադարձել է հարազատների սեղանի մոտ:
Սակայն Լյուդմիլան չի հանդարտվել: Նա բարձրաձայն հայհոյանքներ է տվել, իսկ Բենիամինի ու նրա հարազատների կողքով անցնելիս ձեռքով ու մատներով հայհոյական շարժումներ ու ժեստեր է արել:
Բենիամինը հարազատների ներկայությամբ դա չի հանդուրժել ու դարձյալ ներքաշվել է հայհոյանքների ու քաշքշոցների մեջ:
Ակումբի աշխատանքը խաթարվել է, Լյուդմիլան ու Բենիամինը չեն ենթարկվել ակումբի անվտանգության աշխատողների հորդորներին, օրինական պահանջներին: Նրանք շարունակել են քաշքշել միմյանց, հարվածներ հասցնել:
Բռնության գործադրմամբ խուլիգանություն կատարելու համար Բենիամին Մաթևոսյանին մեղադրանք է առաջադրվել ՀՀ քրեական օրենսգրքի 258 հոդվածի 2-րդ մասով:
Դեպքից հետո Բենիամինը, չմտածելով, որ քրեական պատասխանատվության կենթարկվի, մեկնել է Ռուսաստան, ապա վերադարձել ու հենց երևանյան օդանավակայանում բռնվել ու բերման է ենթարկվել:
Խուլիգանությունը հրահրած Լյուդմիլան նույնպես երբևէ կենթարկվի քրեական պատասխանատվության, եթե հայտնաբերվի ու բռնվի: Նրա մասը այս քրեական գործից անջատված է որպես առանձին վարույթ, Լյուդմիլայի նկատմամբ հայտարարված է հետախուզում:
Մեղադրող Գեղամյանը չառարկեց Բենիամին Մաթևոսյանի գործը արագացված կարգով քննելու դեմ:
Բենիամինի շահերի պաշտպանը գործին կցելու համար ներկայացրեց իր պաշտպանյալի անձը բնութագրող մի քանի փաստաթղթեր, այդ թվում՝ դրական բնութագիր՝ հարևանների կողմից, ովքեր Բենիամինին բնութագրել էին որպես «պարկեշտ, խաղաղասեր, հարգալից, շատ դրական անձնավորության՝ շատ լավ ընտանիքից»:
Բենիամինը դատարանում իրեն զուսպ ու հարգալից էր պահում, իսկ նրա հանդարտ դեմքին նայելիս դժվար էր պատկերացնել, թե ինչպես է անսթափ Լյուդմիլային հավասար հայհոյանքներ տեղացել, քաշքշել նրան, բռնացել ու խաթարել գիշերային ակումբի աշխատանքը:
Մեղադրողն ասաց, թե ամբաստանյալի պատասխանատվությունն ու պատիժը ծանրացնող հանգամանքներ գործով ի հայտ չեն բերվել: Մեղադրական ճառով հանդես գալու համար նա ժամանակ խնդրեց: Հաջորդ դատական նիստը տեղի կունենա նոյեմբերի 20-ին: