Վրացական Apsny.ge կայքի փոխանցմամբ, Վրաստանի նախագահ Միխեիլ Սաակաշվիլին ամերիկյան Foreign Policy ամսագրին տված հարցազրույցում անդրադարձել է Առևտրի համաշխարհային կազմակերպությանն (ԱՀԿ) Ռուսաստանի անդամակցության խնդրին.
«Վրաստանն օժտված է ԱՀԿ-ին Ռուսաստանի անդամակցության գործընթացը շրջափակելու կարողությամբ: Նախկինում ռուսական կողմը հայտարարում էր, որ իրենք եթե պայմանավորվեն ամերիկացիների հետ, ապա դա բավական կլինի, քանի որ այդ պայմանավորվածության մեջ ինքնաբերաբար կմտնեն նաև վրացիները: Ռուսները նշում էին, որ Սաակաշվիլիին լռեցնելու համար բավարար կլինի ընդամենը մեկ հեռախոսազանգ կատարել ԱՄՆ փոխնախագահ Բայդենին:
Սակայն դա այդպես չէ, և ամերիկացիները դա լավ գիտեն: Ամերիկացիները բոլոր ջանքերը գործադրեցին` ռուսներին հասկացնել տալու համար, որ նրանք սխալվել են: ԱՄՆ-ի հենց այդ դիրքորոշումն էլ ռուսներին ստիպեց մեզ հետ նստել բանակցությունների սեղանի շուրջ, ինչն արդեն մեծ առաջընթաց է:
Ռուսները հիմա էլ հայտարարում են, թե կարող են ԱՀԿ-ին անդամակցել առանց Վրաստանի համաձայնության: Ես նրանց «հաջողություն» եմ ցանկանում, թող փորձեն նման կերպ: Վրաստանը չի պատրաստվում այդ հարցում հետքայլ կատարել և հրաժարվել իր սկզբունքներից:
Մենք պատրաստ ենք ռուսական կողմի հետ բանակցել բացառապես տնտեսական խնդիրների շուրջ, սակայն, դժբախտաբար, նրանք յուրաքանչյուր տնտեսական խնդիրը վերածում են քաղաքականի: Հենց դրանում էլ կայանում է մեր բանակցությունների բարդությունը»: