Պետքարտուղարի բոլոր այցերը դրվել են նրա տեղակալներ Բերնսի և Նայդսի վրա:
ԱՄՆ պետքարտուղար Հիլարի Քլինթոնը, ով հիվանդությունից հետո երկուշաբթի օրը դուրս է եկել աշխատանքի, իրեն լավ է զգում: Նա ամբողջական գրաֆիկով անցել է աշխատանքի, սակայն բժիշկները վերականգնողական փուլում նրան խորհուրդ չեն տվել արտասահմանյան այցեր կատարել:
Քլինթոնին բոլոր 75 աշխատակիցները դիմավորել են ծափերով և նրան են նվիրել ամերիկյան ֆուտբոլի համար նախատեսված գլխարկ, որը զարդարված է եղել ամերիկյան գերբով: Գլխարկի վրա նաև 112 թիվն է նշված եղել, որը խորհրդանշում է այն երկրների թիվը, որտեղ Քլինթոնն այցեր է կատարել:
Քլինթոնն արդեն խորհրդակցություն է անցկացրել, նաև ունեցել է մի շարք ոչ պաշտոնական հանդիպումներ: Նա ծրագրում է մասնակցել նոր պետքարտուղարի և Լիբիայի հարցով ղեկավարի նշանակման Կոնգրեսում կայանալիք լսումներին:
Դեկտեմբերի վերջին արտասահմանյան այցից հետո Քլինթոնը ստամոքսային թունավորում էր ունեցել, իսկ վերականգնվելուց հետո պետքարտուղարն օրգանիզմի ջրազրկման հետևանքով ուշագնաց էր եղել, ընկել էր և ուղեղի ցնցում ստացել: Բժիշկները նրա մոտ տրոմբ էին հայտնաբերել և դեկտեմբերի 31-ին նրան հոսպիտալացրել էին:
Հունվարի վերջին Քլինթոնին պետքարտուղարի պաշտոնում կփոխարինի Սենատի միջազգային հանձնաժողովի նախագահ Ջոն Քերրին:
