Մեծ Բրիտանիայի վարչապետ Դևիդ Քեմերոնը հայտարարել է, որ Լոնդոնը նոր սառը պատերազմ չի ցանկանում Ռուսաստանի հետ, սակայն նախազգուշացրել է, որ Ուկրաինայի ճգնաժամում Մոսկվայի դերը չի կարող անհետևանք մնալ: Այս մասին գրում է BBC-ն:
Ելույթ ունենալով Լոնդոնի քաղաքապետի ամենամյա բանկետում՝ Քեմերոնն ընդգծել է, որ իր գլխավոր խնդիրը համարում է բրիտանական տնտեսության առողջացումը, ինչն անհնար է առանց արտաքին քաղաքական կուրսի ճիշտ ընտրության, քանի որ ազգային անվտանգությունից է կախված տնտեսական անվտանգությունը:
Խոսելով Ուկրաինայում ստեղծված իրավիճակի մասին՝ Քեմերոնը հիշատակել է վերջին օրերի հաղորդագրություններն այն մասին, որ անջատողականների վերահսկողության տակ գտնվող Ուկրաինայի հարավարևելյան տարածքներում նկատվել է ռուսական հավելյալ ծանր սպառազինություն, և հայտարարել, որ «Ռուսաստանի անօրինական գործողությունները ապակայունացնում են ինքնիշխան պետությունը և խախտում դրա տարածքային ամբողջականությունը»:
Քեմերոնն ասել է, որ չի հավատում խնդրի ռազմական լուծմանը և խոսելով տնտեսական պատժամիջոցների մասին՝ ասել, որ դրանք «արդյունք են տալիս»:
«Ռուսաստանից նկատվում է կապիտալի հոսք, բանկերին պակասում է ֆինանսավորումը, իսկ ֆոնդային շուկան և ռուբլին զգալիորեն անկում են ապրել»,- ասել է նա:
Քեմերոնը նաև հայտարարել է, որ սառը պատերազմից ելքը անխուսափելի չի համարում:
