Վրաստանի պաշտպանության նախկին նախարար Իրակլի Ալասանիան մեկնաբանում է իր հասցեին Վրաստանի վարչապետի վիրավորական արտահայտությունները և հայտնում է, թե այդ հայտարարությամբ «վարչապետը կորցրել է իր դեմքը», գրում է «Գրուզիա Օնլայնը»։
Հիշեցնենք, որ Վրաստանի վարչապետ Իրակլի Ղարիբաշվիլին պաշտպանության նախարարի պաշտոնից ազատված Իրակլի Ալասանիային անվանում է «ավանտյուրիստ», «հիմար» և «հավակնոտ»։
«Ցավում եմ, որ վարչապետը դուրս է եկել կոռեկտության սահմաններից։ Իմ կարծքով, նրանք, ովքեր ճիշտ են, իրենց դեմքը չեն կորցնում։ Տվյալ դեպքում վարչապետը դեմքը կորցրել է։ Բայցևայնպես, ես թանկ եմ գնահատում այն ժամանակը, որ անցկացրել եմ իմ գործընկերների ու կառավարության հետ և, բնականաբար, չեմ մեկնաբանի նրանց հայտարարությունները։ Չնայած այն բանին, որ դատախազության կատարած քայլերը բաժանել են մեր ճանապարհները, ես կոչ եմ անում մնալ կոռեկտության սահմաններում։
Կարծում եմ, երկրի օգտին չէ, որ վարչապետը դեմքը կորցնում է։ Ես չեմ կարող պատասխանել նույն կերպ, ես հարգում եմ ինստիտուցիաները։ Ուզում եմ նրան կոչ անել այլևս չկրկնել դա։ Դա ճիշտ չէ և իմ, և երկրի, և իր գործընկերների հանդեպ։ Ես համոզված եմ, որ նրա այսօրվա հայտարարությունը դրականորեն չի ընդունվում»,- հայտարարել է Ալասանիան։
