ԱՄՆ Կոնգրեսի Ներկայացուցիչների պալատի անդամ Ադամ Շիֆը և Կալիֆոռնիայի նահանգային օրենսդիր Մայքլ Գատոն երեկ ԱՄՆ-ում կայացած միջանկյալ ընտրությունների արդյունքներով իրենց տեղը չեն զիջել հանրապետականներին: Այս մասին հայտնում է Glendale News Press-ը:
Կալիֆոռնիայի 28-րդ կոնգրեսական ընտրաշրջանում ձայների 100 տոկոսի հաշվարկի արդյունքներով՝ Շիֆը ստացել է 69.944 ձայն կամ ձայների 76 տոկոսը:
Կալիֆոռնիայի նահանգային օրենսդիր մարմնի ընտրություններում 43-րդ ընտրաշրջանից հայամետ Մայք Գատոն ստացել է 40.167 ձայն կամ ընտրողների ձայների 65.8 տոկոսը:
Նշենք, որ երկու քաղաքական գործիչներն էլ հայամետ են: Ադամ Շիֆը հանդես է գալիս Հայոց ցեղասպանության ճանաչման, Ղարաբաղյան հակամարտության կարգավորման ջանքերի կրկնապատկման օգտին: Նշենք նաև, որ նա իր ներդրումն է ունեցել նոյեմբերի 18-23-ը Սպիտակ տանը հայ որբերի գործած կարպետի ցուցադրությունը կյանքի կոչելու հարցում:
Այս տարվա մայիսին Կալիֆոռնիայի խորհրդարանը ընդունել էր Ղարաբաղի անկախությունը ճանաչող բանաձև, որի հեղինակն էր նահանգային օրենսդիր Մայք Գատոն:
