Ռուսաստանը հերթական փորձն է անում տարածաշրջան և Վրաստան մտնելու համար: Այս մասին այսօր «Առաջին լրատվական»-ի հետ զրույցում ասաց Միջազգային և անվտանգության հարցերի հայկական ինստիտուտի հիմնադիր նախագահ Ստեփան Սաֆարյանն՝ անդրադառնալով Վրաստանում կայծակնային արագությամբ զարգացող քաղաքական ճգնաժամին և դրա պատճառներին:
Նա նշեց, որ բազմիցս ասվել է, որ Ուկրաինան և Հայաստանը ԵՄ «Արևելյան գործընկերության» ծրագրի տապալման խորհրդանիշ երկրներն են, յուրաքանչյուրը՝ յուրովի. Ուկրաինան խորհրդանիշ դարձավ այն բանի,թե ինչ կպատահի այն երկրներին, որոնք պատրատվում են չխոնարհվել Ռուսաստանի առջև, իսկ Հայաստանը ցույց տվեց, թե ինչ է սպասվում հնազանդներին: Հետևաբար, քաղաքական վերլուծաբանի խոսքով, պետք է հասկանալ, որ Մոլդովայի, Վրաստանի նկատմամբ նոր ճնշումներ են բանեցվելու Կրեմլի կողմից:
«Վերջին շրջանում Աբխազական երկաթուղու վերագործարկման թեմայի շրջանառությունն ամենևին էլ անմեղ նպատակներով չիրականացվեց, դա իհարկե ձեռնտու էր Հայաստանին, բայց սա ցույց է տալիս, որ Ռուսաստանը հերթական փորձն է անում տարածաշրջան և Վրաստան մտնելու համար, բայց քանի որ վրացական իշխանություններն արդեն որերորդ անգամն են կատեգորիկ մերժում են և ի դեպ անգամ Սերժ Սարգսյանին չհաջողվեց ամռան ընթացքում քննարկման առարկա դարձնել այդ հարցը, ինչպես հայտարարեցին վրաց պաշտոնյաները, հետևաբար ՌԴ-ն անցել է գրոհի այլ խողովակներով և այստեղ չափազանց ուշագրավ է Իրակլի Ալասանիայի հայտարարությունն այն մասին, որ թիրախի տակ երկրի եվրաինտեգրման կուրսն է, երբ չափազանց առանցքային պաշտոններ, որոնք երկրի արտաքին քաղաքական ուղղությունն են որոշում՝ Պաշտպանության նախարարությունն ու ԱԳ նախարարությունը, եվրաինտեգրման կողմնակիցների ձեռքում են և այս կտրվածքով նրա մեղադրանքներն ինչ որ իմաստ են ստանում և ճշմարտություն են դառնում իմ կողմից համառոտ նկարագրված իրավիճակում: Կարծես թե վրացական իշխանության ներսում թևեր են ի հայտ եկել, ակնհայտորեն խնդիր կա գոնե դանդաղեցնել Վրաստանի եվրաինտեգրման կուրսը հատկապես երբ չհաջողվեց կասեցնել Մոլդովայի և Վրաստանի ԱՀ ստորագրման գործընթացը: Ռուսաստանն ակնհայտորեն չափազանց բացասական վերաբերվեց Վրաստանի վերաբերյալ ՆԱՏՕ-ի գագաթնաժողովին ընդունած փաստաթղթին և նույնիսկ հարկ համարեց այդ կապակցությամբ ԱԳՆ-ի մակարդակով նախազգուշացում ուղարկել և այս կտրվածքով նկատելի է, որ լարվածություն է հասունանում Վրաստանի շուրջ և Վրաստանի իշխանությունը ճեղքվածք է տալիս արտաքին ճնշումների տակ »,- մեկնաբանեց Ստեփան Սաֆարյանը՝ շարունակելով, որ մի կողմից ՆԱՏՕ-ն ուելսյան գագաթնաժողովի ընդունած հռչակագրի համաձայն պետք է քայլեր ձեռնարկեր, մյուս կողմից ՌԴ-ն ԱԳՆ հայտարարության միջոցով հասկացրել էր, որ ինքն այդ քայլերը չի ընդունելու: Հետևաբար, ըստ քաղաքագետի, երբ խոսում ենք Հայաստանի դասերի մասին, ապա պետք է հասկանալ, որ չափազանց մտահոգիչ զարգացումներ են սկսվում Հայաստանի հյուսիսային հարևանի շուրջ:
Ի դեպ, Ստեփան Սաֆարյանը նկատեց, որ պաշտոնանկության լուրը համընկնում է մեկ այլ լուրի հետ: « ՆԱՏՕ-ի սերտ գործընկեր դարձած Ուկրաինան, Վրաստանը, Մոլդովան ստեղծելու են պաշտպանվող երկրների ալիանս և որոշակի փոխկապակցվածություն են ունենալու ՆԱՏՕ-ի հետ այն աստիճան, որ որքան էլ ՆԱՏՕ-ն ռազմական առումով ներկա չի լինելու այդ տարածքներում այնուամենայնիվ այդ երկրների համատեղ ռազմական ուժերը փաստացի կարող են լինել հենարան ՆԱՏՕ-ի համար, հենց այս լուրի համատեքստում խոսակցություններ էր գնում ՆԱՏՕ-ի հետ ասոցացված որոշակի ենթակառուցվածքներ ստեղծելու մասին: Այս երեք երկրների անուղղակի ասոցացումն է գնում ՆԱՏՕ-ի հետ և սա Ռուսաստանի պատասխանն է այդ քայլերին: Հետևաբար, իհարկե, խնդիրը ոչ թե Իրակլի Ալասանիայի մրցույթներ շահելու խնդրի մեջ է, այլ իսկապես Վրաստանի եվրաինտեգրման և ՆԱՏՕ-ին ինտեգրվելու գործընթացների հետ: Ես համարում եմ, որ Ալասանիայի գնահատականները համապատասխանում են իրականությանը»,- ասաց Ստեփան Սաֆարյանը:
Հիշեցնենք, որ երեկ Վրաստանի վարչապետ Իրակլի Գարիբաշվիլին Կառավարությունից հեռացրեց Պաշտպանության նախարար Իրակլի Ալասանիային կոռուպցիոն աղմկահարույց միջադեպի համար, այնինչ նախկին նախարարի խոսքով զարգացումների թիրախում Վրաստանի եվրաինտեգրացիայի կուրսն է, քանի որ Ալասանիան ու իր թիմը Վրաստանում այդ կուրսը զարգացնող գործիչներն են: Ի դեպ, Ալասանիայի հեռացմանը հաջորդեց Վրաստանի ԱԳ նախարար Մայա Փանջիկիձեի և նրա տեղակալի հրաժարականը:
