Վրաստանի պաշտպանության նախարար Իրակլի Ալասանիան հեռացվել է աշխատանքից: Այս մասին գրում է TASS-ը` վկայակոչելով Վրաստանի վարչապետ Իրակլի Ղարիբաշվիլիին:
Վարչապետը դա պատճառաբանել է նրանով, որ պաշտպանության նախարարն իր գերատեսչությունում կոռուպցիայի վերաբերյալ հետաքննությունը սկսել է քաղաքականացնել:
«Որպես պաշտպանության նախարար գերատեսչության մի շարք աշխատակիցների վերաբերյալ Գլխավոր դատախազության հետաքննությանն աջակցելու փոխարեն Իրակլի Ալասանիան սկսեց քաղաքականացնել այդ հարցը»,- հայտարարել է Ղարիբաշվիլին:
Վարչապետի խոսքերով` Ալասանիան բացառապես անպաատսխանատու հայտարարություններ է արել այն մասին, որ մի շարք աշխատակիցների նկատմամբ Գլխավոր դատախազության գործողությունները հարձակում են պաշտպանության նախարարության և Վրաստանի եվրոատլանտյան ուղու վրա:
«Պաշտպանության նախարարության և Վրաստանի զինված ուժերի հետագա քաղաքականացումը թույլ չտալու, ինչպես նաև գերատեսչության մի շարք աշխատակիցների նկատմամբ Գլխավոր դատախազության հետաքննության շարունակության համար նորմալ պայմաններ ստեղծելու նպատակով որոշում է ընդունվել Ալասանիային ազատել պաշտպանության նախարարի պաշտոնից»,- նշել է Ղարիբաշվիլին:
