Շաբաթ օրը ԱՄՆ նախագահ Բարաք Օբաման ավարտում է կարճատև ձմեռային արձակուրդը, որն, ավանդույթի համաձայն, անցկացրել է իր հայրենի Հավայի նահանգում: Այս մասին հաղորդում է RIA Novosti-ն` վկայակոչելով Սպիտակ տան հաղորդագրությունը:
«Շաբաթ երեկոյան նախագահը կլքի Հոնոլուլուն և կմեկնի Վաշինգտոն»,- ասվում է հաղորդագրության մեջ:
Այս տարի նախագահը Հավայիում անցկացրել է միայն մի քանի օր: Արձակուրդի ընթացքում նա եղել է մայրաքաղաք Վաշինգտոնում, որտեղ բանակցություններ է վարել հանրապետականների հետ` նվիրված բյուջետային հարցերին:
Ակնկալվում է, որ մոտակա օրերին Օբաման հանդես կգա մի քանի կարևոր հայտարարություններով: Մասնավորապես նա պետք է ասի պաշտպանության նախարարի պաշտոնում թեկնածուի անունը: Ամենայն հավանականությամբ, այդ պաշտոնը կստանձնի նախկին սենատոր Չակ Հեյգելը:
Հունվարի 21-ին կայանալու է Օբամայի երդմնակալության արարողությունը:
