Բրիտանացի երգչուհի Ադելի «21» ալբոմը դարձել է ամենաշատ վաճառված ալբոմն ԱՄՆ-ի տարածքում 2012 թ. արդյունքներով: Ինչպես հաղորդում է Billboard-ը, Ադելի ձայնասկավառակը, որը վաճառքի էր հանվել դեռևս 2011 թ. մարտին, արդեն երկրորդ տարին է, ինչ գլխավորում է ԱՄՆ-ի տարածքում ամենաշատ վաճառված ալբոմների ցուցակը: Սա առաջին նման դեպքն է վարկանիշային աղյուսակը կազմելու 21 տարվա ընթացքում:
2012 թ. ընթացքում ԱՄՆ-ի տարածքում վաճառվել է «21» ալբոմի 4.41 միլիոն օրինակ:
2012 թ. արդյունքների համաձայն, երկրորդ հորիզոնականն է զբաղեցրել Թեյլոր Սվիֆթի «Red» ձայնասկավառակը, որն ԱՄՆ-ում վաճառվել է 3.11 միլիոն օրինակով: Եռյակը փակում է One Direction խմբի Up All Night ալբոմը, որը վաճառվել է 1.62 միլիոն օրինակով:
2012 թ. ամենահաջողակ թվային սինգլ է դարձել ավստրալացի երգիչ Գոթյեի Somebody That I Used to Know աշխատանքը, որը ձայնագրվել է նորզելանդացի երգչուհի Քիմբրայի մասնակցությամբ: Այն ներբեռնվել է 6.8 միլիոն անգամ:
Կանադացի երգչուհի Քարլի Ռեյ Ջեփսենի Call Me Maybe երգը թվային ձևաչափով վաճառվել է 6.47 միլիոն անգամ:
Fun խմբի We Are Young երգը զբաղեցրել է երրորդ հորիզոնականը( 5.95 միլիոն օրինակ):
