Սիրիայի նախագահ Բաշար Ալ-Ասադը քիչ առաջ հանդես է եկել երկրի խորհրդարանում, որտեղ խոսել է երկրում տեղի ունեցող քաղաքական զարգացումների մասին: Մասնավորապես նա անդրադարձել է մարտի 18-ից Սիրիայի տարբեր տարածքներում տեղի ունեցող բախումների և դրանց պատճառների ու հետևանքների մասին:
«Մենք պետք է դասեր քաղենք տեղի ունեցածից: Ճգնաժամերը տեղի են ունենում այն բանի համար, որպեսզի միջոցներ ձեռք առնվեն դրանք հաղթահարելու և դրանցից ավելի ամուր դուրս գալու համար»,- նշել է Ալ-Ասադը:
Ալ-Ասադի համոզմամբ, ճգնաժամն ու բախումները երկրում հրահրվել են դրսից, խռովարարները ցանկանում են քանդել Սիրիան, որպեսզի «իսրայելական ծրագրերի իրագործման ճանապարհին վերանա վերջին խոչընդոտը»:
«Սիրիան դարձել է արտաքին մեծ դավադրության զոհ, որը գործում է նաև երկրի ներսում: Այդ դավադրության նպատակն էր Սիրիայի փլուզումը, որպեսզի իսրայելական ծրագրերի իրագործման ճանապարհին վերացնի վերջին խոչընդոտը»,- եզրակացրել է Ալ-Ասադը:
«Խռովարարները փոքրամասնություն են կազմում… մենք չգիտեինք, թե ինչ է իրականում կատարվում, քանի դեռ տեղի չունեցան դիվերսիաներ: Դրանից հետո մենք տեսանք բարեփոխումներ և սպանություններ պահանջողների տարբերությունը: Մենք ժողովրդական պահանջների կողմնակից ենք, սակայն չենք պատրաստվում աջակցել քաոսին և ավերածություններին»,- ավելացրել է Ասադը:
Նա դիմել է նաև Դարաա քաղաքի բնակիչներին, որտեղից սկսվել էին բախումները` նշելով, որ այդ քաղաքի բնակիչներն իսկական հայրենասերներ են, ազնվության տիպար, սակայն նրանք կապ չունեն բռնություններ հրահրածների հետ:
«Դարաայում և Լաթակիայում հեղված արյունը սիրիական արյուն է, իսկ տուժածները` սիրիացիներ, նրանցից ոչ բոլորն են սադրիչներ»,- ասել է Սիրիայի նախագահը:
Սիրիայի նախագահն անդրադարձել է նաև բարեփոխումների անցկացման անհրաժեշտությանը` նշելով, որ բողոքի դուրս եկածների որոշ պահանջներ արդարացված են, և լրջագույն փոփոխությունների անհրաժեշտություն կա, սակայն ժամկետներ չի նշել: Ըստ Ալ-Ասադի` բարեփոխումների պահանջի մեջ կա իրավացիություն: Ցուցարարները խոսել են այն բարեփոխումների մասին, որոնք Սիրիայի կառավարությունը պետք է իրականացներ, սակայն հետաձգել է դրանց կյանքի կոչումը: Այս քայլը նա բացատրել է առաջնահերթությունների փոփոխությամբ, երբ անհրաժեշտ էր արձագանքել իրադարձություններին պաղեստինյան ինքնավարությունում, Իրաքում և Լիբանանում:
Բաշար Ալ-Ասադն ասել է, որ բարեփոխումները սեզոնային նորաձևություն չեն, այլ երկարատև ծրագրավորման արդյունք: «Կառավարության միջոցառումները չեն սկսվելու դատարկ տեղից, այլ դառնալու են արդեն իսկ ձեռնարկված քայլերի շարունակություն»,- ասել է նա:
Նա հաստատել է, որ երկրում մտցվելու է բազմակուսակցական համակարգ, մշակվելու է ԶԼՄ-ների մասին նոր օրենք, պայքար է մղվելու կաշառակերության դեմ, անհրաժեշտություն կա ամրապնդելու ազգային միասնությունը. «Եթե մեզ հիմա պատերազմ պարտադրեն, մենք պատրաստ ենք դրան: Բարի գալուստ»,- ասել է Ալ-Ասադը:
«Սիրիայի ժողովրդի մաս կազմողները միշտ քայլում են գլուխը բարձր պահած: Ամեն օր մեր թշնամիները կազմակերպված և հրապարակայնորեն անում են ամեն ինչ, որպեսզի վնասեն Սիրիային: Մենք ընդունում ենք. նրանք ճիշտ ժամանակ էին ընտրել, սակայն սխալվել էին երկրի ընտրության հարցում. մեր ժողովրդի դեպքում խռովությունները չեն անցնում»: Ալ-Ասադը, սակայն, կոնկրետ անուններ չի նշել:
Ասադի ելույթը մի քանի անգամ ընդհատվել է բուռն ծափահարություններով, իսկ խորհրդարանի շենքի մոտ հավաքված է եղել մի քանի հազար մարդ` հաջակցություն գործող իշխանությունների:
Այս մասին հաղորդում է սիրիական SANA գործակալությունը:
