Սպասումներով լի մեր կյանքում ես կարևոր եմ համարում ընտրակաշառք կոչվող ամոթալի երևույթով ուղեկցվող խորհրդարանական ընտրություններում խոսքի ազատության ապահովումը։ Մրցակցող քաղաքական և ոչ քաղաքական ուժերին ինքնաարտահայտման հավասար հնարավորություններ տրամադրելը՝ թեև օրենքի և Սահմանադրության պահանջ է, բայց առ այսօր, ըստ էության, չէր գործել Հայաստանում։ Դա, ըստ իս, միակ սակայն շատ կարևոր ձեռքբերումն է։ Ցավոք սրտի, այլ ոլորտներում 2012 թվականը որևէ էական փոփոխություն չբերեց։ ԱԻՄ առաջնորդ, նախագահի թեկնածու Պարույր Հայրիկյանն «Առաջին լրատվական»-ի հետ զրույցում այսպես ամփոփեց 2012 թվականը:
«Ժողովրդիդ ինչ-որ բան նվիրելու համար, նախ պիտի դու նվիրված լինես, կարծում եմ։ Եթե որևէ մեկի ինչ-որ բան ես մաղթում, ըստ էության ասում ես և վերջ։ Ես նախընտրում եմ ոչ միայն ասել, այլև տալ, ցույց տալ մաղթանքներիս հասնելու ճանապարհը»,- ասաց նա։
Ըստ Պարույր Հայրիկյանի՝ մարդ արարածի կարևորագույն արժանիքը նրա ինքնորոշման իրավունքն է։ Ժողովուրդը մարդկանց հավաքականությունն է, և այդ հավաքականության ինքնորոշման գործիքը ժողովրդավարությունն է. «Եթե սիրում ես ժողովրդին, նրան պիտի մաղթես ազատագրում ամեն տեսակի կապանքներից և անընդմեջ ինքնորոշվելու իրավունք, այսինքն՝ ժողովրդավարություն։ Դա ոչ միայն մաղթանք է, այլև գործ։ Եթե հայերս առաջինը պետականորեն որդեգրենք մատուցվող սկզբունքները և դրանցից բխող համակարգը, ապա կդառնանք աշխարհի ամենաժողովրդավարական և այդ տեսանկյունից ամենաօրինակելի երկիրը, իսկ համակարգը միջազգայնորեն կամրագրվի որպես հայկական ժողովրդավարություն․․․ Անհամեստ չհամարեք, դրանից մեծ նվեր դժվարանում եմ պատկերացնել։ Աստված բոլորիս պահապան»:
