Ճապոնիայի զինված ուժերի հրամանատարությունը սկսել է խաղաղապահ առաքելություն իրականացնող իր զորախումբը դուրս բերել Գոլանի բարձունքներից։ Զորախումբը, որի դուրս բերման պատճառ է հանդիսացել Սիրիայում իրադրության վատթարացումը, արդեն 16 տարի տեղակայված է նշված տարածքում։ Այս մասին հաղորդում է NHK-ն։
Առաջին խումբը՝ 33 հոգի, արդեն վերադարձել է հայրենիք։ Իսրայելի և Սիրիայի դիրքերի միջև դեռևս մնում են ՄԱԿ-ի մանդատով գործող 14 զինծառայողներ։ Նրանք կլքեն տարածքը մինչև 2013-ի հունվարի վերջը։
Գոլանի բարձունքներն Իսրայելի կողմից գրավվել է 1967 թ. «Վեցօրյա պատերազմի» ժամանակ։ 1974-ից ՄԱԿ-ի հովանու ներքո այդ տարածքում կազմավորվել է ապառազմականացված գոտի, որը վերահսկվում է խաղաղապահների կողմից։ 1996-ից Ճապոնիան այդ գործողությունների մշտական մասնակիցն է։ Նրա զինծառայողների հիմնական խնդիրը տեղի բնակչությանը մարդասիրական օգնությամբ ապահովելն է։
Նոյեմբերին սիրիական կողմից բացված կրակահերթի հետևանքով վիրավորվել էր խաղաղապահ առաքելություն իրականացնող ավստրալիական մեկ զինծառայող։