Գերմանիայի եւ Լեհաստանի արտգործնախարարներ Գիդո Վեստերվելեի եւ Ռադոսլավ Սիկորսկու այցը Բելառուս անմիջապես ԶԼՄ-ների կողմից կապվել է առաջիկա դեկտեմբերին կայանալիք նախագահական ընտրությունների հետ: Այս մասին գրում է ռուսական Коммерсант թերթը:
Gazeta Wyborcza-ի տվյալներով, երկու նախարարները Մինսկում են` Լուկաշենկոյին կոչ անելու անցկացնել ընտրությունները եվրոպական չափանիշներին համապատասխանաբար: Բելառուսական ընդդիմությունն արդեն հայտարարում է, որ ընտրությունները կեղծված են, եւ Բելառուսի նախագահն արդեն արել է ամեն ինչ, որպեսզի վերարտադրվի: Թերթի փոխանցմամբ, նախարարներն առաջարկել են լավ ընտրություններ` եվրոպական կառույցների հետ ավելի սերտ համագործակցելու դիմաց:
Այսպիսի քայլ եվրոպացի պաշտոնյաներն իրականացրել էին 2008թ. ընտրություններից առաջ, երբ նմանատիպ առաջարկով էին հանդես եկել: Այդ ժամանակ Լուկաշենկոն խոստումը չի կատարել, իսկ Եվրամիությունն էլ չէր ճանաչել այդ ընտրությունների արդյունքները:
Լուկաշենկոն հավաստիացրել է, որ բոլոր մտահոգությունները զուր են, եւ որ ընտրությունները համապատասխանելու են ժողովրդավարական բոլոր նորմերին: Սիկորսկին հակադարձել է. «Ուզում եմ ձեզ ձեր խոսքի վրա բռնեցնել` հուսալով, որ ընտրությունները կանցնեն այնպես, ինչպես դուք ասել եք»,- ասել է Ռադոսլավ Սիկորսկին:
Հոդվածագիրը նաեւ նշում է, որ Մոսկվայի հետ Լուկաշենկոյի, մեղմ ասած, վատ հարաբերությունները թույլ չեն տալիս բելառուսական «բատկային» մանեւրելու մեծ հնարավորություն ունենալ: Սակայն նաեւ եզրակացնում են, որ նույնիսկ այս իրավիճակում Լուկաշենկոն չի համաձայնվի մաքսիմալ ժողովրդավարական ընտրություններ անցկացնել, քանի որ ամենալուրջ ուսումնասիրությունները ցույց են տալիս, որ այս պահին Լուկաշենկոյի օգտին մտադիր է քվեարկել ընտրողների առավելագույնը 40-45%-ը: Եվ սա այն դեպքում, երբ ընդդիմության համար հեռուստաեթերը փակ է: Եթե Լուկաշենկոն հետեւի ԵՄ պահանջներին, ապա երկրորդ փուլն անխուսափելի է: