Հայաստանում այսօր արտադրվում են մի շարք զինատեսակներ, որոնց հիմնական մասը արտադրվել են նաև 80-ականների վերջին և 90-ականների սկզբին: Մասնավորապես` մենք արտադրում ենք 5.45 մմ և 7.62 մմ տրամաչափի փամփուշտներ, որոնք, սակայն, այնքան էլ հուսալի չեն որակի տեսակետից:
Մենք արտադրում ենք նաև ականանետներ, ականանետների արկեր, K-9 տիպի դիպուկահար հրացաններ, որոնք, ըստ որոշ տեղեկությունների, Հունաստան էլ են արտահանվել, K-3 տիպի ինքնաձիգներ` բուլփապ սիստեմով (երբ պարունակը բռնելու տեղի հետևի մասում է), նռնակներ, նռնականետների արկեր, այդ թվում` РПГ նռնականետների արկեր և այլն:
Այս զինատեսակները արտադրվում են Երևանում, Աշտարակում, Չարենցավանում և այլուր:
Բացի այդ, Հայաստանում իրականացվում է նաև եղած զինտեխնիկայի հիմնական մասի վերականգնում և արդիականացում: Վերջին տարիներին մեր ռազմական արդյունաբերությունում փորձում են օգտագործել նաև որոշ բարձր տեխնոլոգիաներ: