ԱՄՆ զինված ուժերը ռազմական Apache ողղաթիռներ են գործարկել՝ պաշտպանելու համար Բաղդադի օդանավակայանը ԴԱԻՇ ծայրահեղական խմբավորման զինյալների հարձակումներից: Այս մասին հայտնել է ԱՄՆ զինված ուժերի շտաբների պետերի կոմիտեի նախագահ, գեներալ Մարտին Դեմփսին:
«Զինյալները գտնվել են օդանավակայանից 20-25 կմ հեռավորության վրա: Եթե նրանց հաջողվեր ճեղքել իրաքյան բանակի դիրքերը, նրանք կկարողանային սկսել դրա գնդակոծումը: Մենք դա թույլ չենք տա, մեզ պետք է այդ օդանավակայանը»,- ասել է Դեմփսին ABC-ին տված հարցազրույցում:
Նա նշել է, որ երբ Իրաքի զինված ուժերը պատրաստ լինեն զինյալների դեմ հարձակողական գործողությունների, երկրում գտնվող ամերիկացի խորհրդականները կարող են սկսել ավելի ակտիվ դեր խաղալ:
Դեմփսին հայտարարել է, որ վերջին շրջանում միջազգային կոալիցիայի երկրների կործանիչները սկսել են ավելի քիչ ռումբեր նետել զինյալների վրա, քանի որ նրանք սովորել են ավելի լավ թաքնվել:
«Հակառակորդը հարմարվում է, ավելի է դժվարանում հարվածներ հասցնելը: ԴԱԻՇ-ի զինյալները գիտեն ինչպես մանևրել և թաքնվել խաղաղ բնակիչների շարքում»,- ասել է Դեմփսին:
