Ինչպես հաղորդում է եգիպտական Al-Masri Al-Youm կայքը, փետրվարի 11-ին հրաժարականի դիմում ներկայացրած երկրի նախագահ Հոսնի Մուբարաքը կստանա մոտ 2,000 եգիպտական ֆունտ թոշակ, որը համարժեք է 339 ԱՄՆ դոլարին: Այս մասին որոշում է կայացրել Եգիպտոսի սոցիալական ապահովագրության հիմնադրամը` այդ երկրի կառավարության դիմումի համաձայն:
Եգիպտոսի նախկին նախագահը նաև ստանալու է լրացուցիչ թոշակ` երկրի ռազմաօդային ուժերի հրամանատարի պաշտոնը նախկինում զբաղեցնելու համար: Սակայն այս գումարի չափը հայտնի չէ: Այն գաղտնի է պահվում, և դրա մասին կարող է իմանալ միայն այն մարդը, ով դա ստանում է:
Այն լուրերի ֆոնին, համաձայն որոնց, Եգիպտոսի նախկին նախագահը տասնյակ միլիարդավոր դոլարների կարողություն ունի, իսկական զավեշտի է վերածում 340 դոլար թոշակի չափը: Մանավանդ որ Մուբարաքին այդ գումարը կարող է պետք չգալ, քանի որ նրա դեմ հարուցվել են քրեական գործեր, իսկ ինքը, ըստ որոշ տվյալների, գտնվում է տնային կալանքի տակ:
