«Չկա թեկնածու, որի համար առաջադրվելու եմ, և որի համար կհանեմ թեկնածությունս»,- «Հ2» հեռուստաընկերության «Խոսքի իրավունք» հաղորդման եթերում ասել է նախագահի թեկնածու Հովիկ Աղազարյանը և հավելել, որ նաև չի բացառվում մի իրավիճակ, որի ժամանակ թեկնածությունը հանի:
Հովիկ Աղազարյանը եղել է խորհրդարանում ՀՅԴ խմբակցության անդամ, ՀՅԴ Հայաստանի Գերագույն մարմնի նախագահ և կուսակցությունից հեռացվել է կանոնադրությունը խախտելու պատճառով. չի ենթարկվել կուսակցական որոշմանը: «Նախկին դաշնակցական եմ միայն պատկանելության իմաստով, գաղափարական իմաստով նույն գաղափարների կրողն եմ»,- ասել է նա:
Անդրադառնալով այն հարցին, որ ինքը հայտնի չէ հանրությանը, նա պատասխանել է. «Ավելի շահեկան է, որ հայտնի չեմ, որովհետև նրանք, ովքեր կան, շատ են աղավաղել կերպարը՝ այս ճամբարից այն ճամբար անցնելով: Ես ժողովրդին թալանելու, արտագաղթը խրախուսելու, աղքատացնելու գործում ճանաչում չունեմ»: Այնուհանդերձ, ըստ նրա, մասնակցում է ընտրություններին` հաղթելու նպատակադրմամբ, և եթե չհաղթի, մեծ տհաճություն չի լինի:
Թեկնածուն քարոզչությանը կհատկացնի 10 միլիոն դրամ` ընկերների միջոցով, և այն կտրամադրի համացանցով ու մամուլով քարոզչությանը: «Յուրաքանչյուր գյուղում պետք է ծնվեն մարդիկ, ովքեր պայքարն առաջ կտանեն: Ես չեմ գնալու գյուղերում միտինգներ անեմ և այլն, և այլն»:
