Խաղաղության Նոբելյան դափնեկիր, երեխաների իրավունքների համար պայքարող հնդիկ Քայլաշ Սատյարտին դատապարտել է Ուկրաինայի արևելքում հակամարտության արդյունքում երեխաների զոհվելը: Այս մասին նա հայտարարել է RIA Novosti-ին տված հարցազրույցում:
«Այն, ինչ կատարվում է Սիրիայում, Ուկրաինայում և Պաղեստինում, կատարվում է քաղաքական պատճառներով, սակայն այդ ճգնաժամերի արդյունքում երեխաներն ամենից շատ են տուժում: Մենք պետք է ոչ միայն դատապարտենք, այլև դեմ արտահայտվենք դրան: Ուկրաինական կառավարության պարտականությունն է փրկել իր քաղաքացիներին, հատկապես երեխաներին»,- ասել է Սատյարտին:
Նրա խոսքերով՝ երեխաների անվտանգությունը ուկրաինական իշխանությունների համար պետք է լինի առաջնային:
«Ես կդիմեմ Ուկրաինայի կառավարությանը այն հարցով, որպեսզի երեխաների դեմ նման գործողություններ հետագայում այլևս չիրականացվեն»,- նշել է նա:
RIA Novosti-ի տվյալներով՝ չնայած հրադադարի ռեժիմին՝ վերջին ամսվա ընթացքում ռազմական գործողությունների արդյունքում Ուկրաինայի արևելքում զոհվել է առնվազն 20 երեխա:
