Դեկտեմբերի 25-ին Սիրիայի ընդդիմադիրները հայտարարել են, որ Սիրիայի կառավարությունն արդեն 18 անգամ կիրառել է մարտական թունավոր նյութեր երկրի բնակչության դեմ: Այս մասին հաղորդում է «Էդիոթ Ահրոնոթ» իսրայելական թերթը:
Այս տեղեկատվության համաձայն՝ գազը կիրառվել է Դամասկոսի շրջակայքում, Հոմսի, Համայի և Իդլիբի մարզերում հակամարտությունը ճնշելու համար: Սիրիայի ընդդիմության ներկայացուիցչ Լույա Մուքդադի խոսքերով՝ կառավարական բանակն օգտագործում է նոր, քիչ հայտնի թունավոր խառնուրդներ:
Ավելի վաղ ընդդիմադիրները հայտարարել էին, որ նախնական տվյալների համաձայն՝ Սիրիայի զինվորականները կիրառում են այսպես կոչված Agent 15 գազ, որն առաջացնում է ժամանակավոր կուրություն, սրտխառնոց, կաթված, թուլություն: Նրանք նման եզրահանգման եկել էին՝ ուսումնասիրելով երեխաների աշխատանիշները, որոնք տուժել են օրեր առաջ Հոմսի արվարձաններից մեկում ենթադրյալ քիմիական հարձակման ժամանակ:
Սիրիացի դասալիք գեներալ Ադնան Սիլուն հայտարարել է, որ կառավարությունն ունի քիմիական զենքի «վիթխարի» զինանոց, որը կարող է կիրառվել բնակչության և ընդդիմադիրների դեմ: Նրա խոսքերով՝ ինքը ներկա է գտնվել խորհրդակցություններին, որտեղ քննարկվել է այդ հարցը:
Ավելի վաղ Արևմուտքը և ԱՄՆ-ը զգուշացրել էին Դամասկոսին, որ քիմիական զենքի օգտագործումը կլինի այն գիծը, որից այն կողմ կարող է սկսվել ռազմական գործողություն ընդդեմ սիրիական ռեժիմի:
