Լիբիայի առաջնորդ Մուամար Քադաֆին այսօր հանդես է եկել կոչով` եվրոպացիներից պահանջելով դադարեցնել «բարբարոսական հարձակումները» իր երկրի վրա` համեմատելով դրանք երկրորդ աշխարհամարտի տարիներին Հիտլերի կիրառած բլիցկրիգ օպերացիայի հետ: Այս մասին հաղորդում է France Presse գործակալությունը: Այս ուղերձը նա հրապարակել է Լոնդոնում այսօր կայանալիք կոնֆերանսից առաջ, որտեղ քննարկվելու է Լիբիայի հարցը:
«Դադարեցրեք ձեր բարբարոսական և կեղծավոր հարձակումը Լիբիայի վրա: Թողեք Լիբիան լիբիացիներին, ձեր գործողություններն ուղղված են մարդկանց սպանելուն և զարգացող երկիրը ոչնչացնելուն»,- ասել է նա:
«Դուք Եվրոպայում և ԱՄՆ-ում չեք հասկանում, որ այս ռազմական գործողությունը բարբարոսական են ու չարագուշակ և հիշեցնում են Հիտլերի գործողությունները, երբ նա մտավ Եվրոպա և ռմբակոծեց Բրիտանիան»,- ավելացրել է Քադաֆին: «Ինչո՞ւ եք դուք հարձակվում նրանց վրա, ովքեր պայքարում են ահաբեկչական «Ալ-Քաիդա» խմբավորման դեմ: Թողե՛ք թող Լիբիայի ճգնաժամի կարգավորմամբ զբաղվի Աֆրիկյան միությունը, Լիբիան կընդունի ցանկացած բան, որ կորոշի այդ միությունը»,- եզրափակել է Ջամահիրիայի առաջնորդը:
Հիշեցնենք, որ այսօր Լոնդոնում 40 երկրների արտգործնախարարների մասնակցությամբ տեղի կունենա միջազգային կոնֆերանս, որի ժամանակ քննարկվելու են միջազգային կոալիցիայի հետագա գործողությունները Լիբիայում: