Դեկտեմբերի 21-ին ԱԺ էթիկայի հանձնաժողովում ԲՀԿ-ական պատգամավոր Միքայել Մելքումյանի դեմ ներկայացված դիմումը քննության վերցնելուց հետո հանձնաժողովը 30 աշխատանքային օր ունի՝ գործն ուսումնասիրելու և որոշում կայացնելու համար: Այս մասին «Առաջին լրատվական»-ին հայտնեց ԱԺ էթիկայի հանձնաժողովի անդամ Արծվիկ Մինասյանը՝ նշելով, որ անկախ հանգամանքներից` գործի քննությունը պետք է իրականացվի ԱԺ կանոնակարգի և օրենքի ուժով: «Գործի քննությամբ կորոշվի, թե ինչ պատասխանատվություն կսահմանվի»,- նշեց Ա. Մինասյանը:
Հիշեցնենք, որ ԲՀԿ խմբակցության պատգամավոր Միքայել Մելքումյանի դեմ դիմում է ներկայացրել Ռազմավարական մշակումների կենտրոն ՀԿ ղեկավար Հրանտ Մելիք-Շահնազարյանը՝ այն հիմնավորելով ՀՀ Սահմանադրության 65-րդ հոդվածի 1-ին մասով, որով արգելվում է համատեղել պատգամավորական և ձեռնարկատիրական գործունեությունը: Վերջինս ապացուցվել էր panorama.am կայքի ջանքերի արդյունքում՝ տեսանյութում պատգամավորը լրագրողի հետ զրույցում հերքում է, որ սեփական տարածքներ ունի, մինչդեռ «հաճախորդի» հետ ձայնագրությունից պարզ է դառնում, որ Մաշտոցի, Կորյունի փողոցներում անձամբ է վարձակալությամբ տալիս իր տարածքները:
Այս աղմկահարույց իրադարձությունից հետո Միքայել Մելքումյանը դադարել է ԱԺ-ում լինել, նա բացակայում էր ԱԺ արտահերթ նիստից, նրա հեռախոսներն անջատված են, իսկ նրա օգնականը խոստացավ Մելքումյանին փոխանցել «Առաջին լրատվական»-ի հարցը՝ մեկնաբանել էթիկայի հանձնաժողովում իր հարցի քննությունը և մեզ փոխանցել պատգամավորի պատասխանը, սակայն նա նույնպես այլևս չպատասխանեց մեր հեռախոսազանգերին:
ԲՀԿ խմբակցության քարտուղար Նաիրա Զոհրաբյանը մեզ հետ զրույցում հերքեց, որ Մելքումյանը ԱԺ չի գնում: Նա հավաստիացրեց, որ ԲՀԿ-ական պատգամավորը մասնակցում է ԱԺ աշխատանքին, այսօր էլ եղել է խմբակցության կողմից մշակված օրինագծերի քննարկմանը: Ըստ Զոհրաբյանի՝ երբ էթիկայի հանձնաժողովի հաջորդ նիստը գումարվի (հավանաբար հունվարի վերջին), ԲՀԿ ներկայացուցիչ Վահան Բաբայանը կներկայացնի գործի էությունը:
«Իրավական դաշտում մեկնաբանելու խնդիր չկա, տարածք վարձակալության տալը որևէ օրենքով ձեռնարկատիրական գործունեություն չէ»,- ասաց Ն. Զոհրաբյանը:
Հետաքրքրականն այն է, որ թեև էթիկայի հանձնաժողովի նիստը դռնփակ է, սակայն տարածված լուրերի համաձայն` Մելքումյանի դիմումը քննության վերցնելու դեմ քվեարկել է ՀՀԿ-ական Դավիթ Հարությունյանը` այն ժամանակ, երբ panorama.am-ը ՀՀԿ-ականների և հենց Դավիթ Հարությունյանի ենթակայության տակ է: Իսկ էթիկայի հանձնաժողովին դիմում ներկայացրած Հրանտ Մելիք-Շահնազարյանն աչքի է ընկել իր իշխանամետ հայացքներով:
Ստացվում է, որ ՀՀԿ-ն Մ. Մելքումյանին «փչացրեց» Գագիկ Ծառուկյանի առաջադրվել-չառաջադրվելու թեժ շրջանում, իսկ հիմա, երբ այդ առումով կրքերը հանդարտվել են, Դ. Հարությունյանն արդեն պաշտպանում է ԲՀԿ-ական իր գործընկերոջը:
Հավելենք նաև, որ մեղադրանքը հաստատվելու պարագայում ԱԺ լիագումար նիստի օրակարգ կարող է մտնել Մ. Մելքումյանին մանդատից զրկելու հարցը:
