Հոկտեմբերի 10-ին Մինսկում կանցկացվեն ԱՊՀ երկրների նախագահների խորհրդի, Եվրասիական տնտեսական բարձրագույն խորհրդի և Եվրասիական տնտեսական միության միջպետական խորհրդի նիստերը: ԵվրԱզԷս-ի նիստի ժամանակ Ռուսաստանի, Ղազախստանի, Բելառուսի, Տաջիկստանի ու Ղրղըզստանի նախագահները կստորագրեն կառույցի լուծարման փաստաթուղթը: Եվրասիական տնտեսական հանձնաժողովի նիստի ժամանակ կքննարկվեն ապրանքների ու ծառայությունների առևտրի, կապիտալի ու աշխատուժի տեղափոխման հետ կապված ակտուալ հարցեր:
Հետաքրքրականն այն է, որ Հայաստանի անդամակցությունը Մաքսային միությանը նախատեսվում էր հոկտեմբերի 10-ին, սակայն պաշտոնական հաղորդագրություններում որևէ խոսք չկա ՄՄ-ին Հայաստանի անդամակցության պայմանագրի ստորագրման մասին: Ավելին՝ հայտնի չէ նաև, թե արդյոք ՀՀ նախագահ Սերժ Սարգսյանը կմեկնի՞ Մինսկ, թե՞ ոչ: Ինչպես հաղորդել է ՀՀ ԱԳ նախարարությունը, արտգործնախարար Էդվարդ Նալբանդյանը կմեկնի Մինսկ՝ Բելառուսի մայրաքաղաքում կայանալիք ԱՊՀ արտաքին գործերի նախարարների խորհրդի նիստին:
«Առաջին լրատվական»-ի հետ զրույցում «Ռեգնում» լրատվական գործակալության խմբագրի պաշտոնում վերստին նշանակված, Ռուսաստանի Դաշնության 1-ին կարգի պետական խորհրդական, քաղաքագետ Մոդեստ Կոլերովը հստակեցրեց, որ հոկտեմբերի 10-ին որոշվելու է Հայաստանի՝ ՄՄ անդամակցության փաստաթղթի ստորագրման օրը:
«Ես կարծում եմ, որ Մինսկում կորոշեն Հայաստանի անդամակցության ստույգ ամսաթիվն ու ստորագրման տեղը: Չի բացառվում, որ հենց այնտեղ էլ տեղի ունենա: Պարզապես Հայաստանը ՄՄ-ի հետ տնային աշխատանքը կիրականացնի կամ մինչ այդ փաստաթղթի ստորագրումը, կամ դրանից հետո: Դրանք տեխնիկական հարցեր են, հոկտեմբերի 10-ին ամեն ինչ պարզ կդառնա»,- ասաց Մոդեստ Կոլերովը՝ շարունակելով, որ որևէ կողմ հոկտեմբերի 10-ին Հայաստանին չի խոստացել փաստաթղթի ստորագրություն:
Ըստ նրա՝ բացառապես ՀՀ ներկայացուցիչներն են տարբեր ժամկետներ նշել: Նրա համոզմամբ՝ Հայաստանը կմիանա եվրասիական պրոյեկտներին, քանի որ եվրասիական եռյակը արդեն տվել է իր համաձայնությունը, իսկ ՀՀ-ի և ԼՂ-ի միջև կտեղակայվի մաքսային անցակետ, որը կկրի ձևական բնույթ, ինչպիսին ՀՀ-ի և ԼՂ-ի միջև ներկայումս գտնվող սահմանային անցակետն է:
