ԲՀԿ առաջնորդ Գագիկ Ծառուկյանը օրերս հայտարարել է, թե մտադիր է դիմել Սերժ Սարգսյանին մարտի 13-ից անազատության մեջ գտնվող հայտնի բռնցքամարտիկ Սամսոն Խաչատրյանի նկատմամբ մեղմ վերաբերմունք ցուցաբերելու խնդրանքով:
«Որպես Օլիմպիական կոմիտեի նախագահ՝ ես երկրի նախագահին դիմելու եմ, որ հնարավորության սահմաններում մեղմ մոտեցում լինի, որովհետև ամբողջ մարզաշխարհում նա սիրված, հարգված մարդ է»: Նշելով, որ Սամսոն Խաչատրյանը կարողացել է Հայաստանի հեղինակությունը ամբողջ աշխարհում բարձր պահել` Ծառուկյանը հավելել է, թե դա չի նշանակում, որ նման մեծ լումա, հեղինակություն ունեցող մարզիկները պետք է օրենքի խախտում թույլ տան:
Գագիկ Ծառուկյանի հայտարարությունը մեկնաբանելու խնդրանքով «Առաջին լրատվականը» դիմեց նախկին քաղբանտարկյալ Դավիթ Մաթևոսյանին: «Չնայած օբյեկտիվության լղոզվածությանը` լավ է, որ Գագիկ Ծառուկյանը նման համարձակություն է ցուցաբերում: Կարծում եմ, դա մարզաշխարհի ներկայացուցիչների որոշակի ազդեցության հետևանք է:
Իսկ համարձակությունն այն է, որ, փաստորեն, Ծառուկյանի ասածից հասկացվում է, որ Սամսոն Խաչատրյանի նկատմամբ քրեական հետապնդման որոշումը կայացվել է Սերժ Սարգսյանի մակարդակով, և միայն նրա մակարդակով կարող է որոշվել գործի ընթացքը, կամ էլ Ծառուկյանը սրանով խոստովանել է, որ Սամսոն Խաչատրյանը քաղբանտարկյալ է»,- նկատեց Դավիթ Մաթևոսյանը: