Այս տարի մայիսին կայացած խորհրդարանական ընտրությունները փոխեցին ՀՀ ներքաղաքական իրականությունը: Այսօր լրագրողների հետ հանդիպման ժամանակ այս մասին ասաց Կովկասի ինստիտուտի տնօրեն Ալեքսանդր Իսկանդարյանը՝ խոսելով «2012 թվականի քաղաքական արդյունքները» թեմայի շուրջ։ Նա արձանագրեց, որ պատմության մեջ առաջին անգամ բոլոր քաղաքական ուժերը խորհրդարանում են, առաջին անգամ բոլոր ուժերը, նաև՝ ընդդիմադիր, խորհրդարանում ներկայացված են, որի արդյունքում քաղաքականությունը փողոցից տեղափոխվեց խորհրդարան: Ըստ քաղաքագետի՝ ներքին քաղաքականության վրա փողոցից ստացվող ճնշումը մեծ էր, իսկ այսօր այդպես չէ: Սակայն, Ալեքսանդր Իսկանդարյանի դիտարկմամբ, փողոցային ակտիվություն կլինի նախագահական ընտրություններին ընդառաջ, թեև ինչ ակտիվություն էլ լինի, 2008 թ. ակտիվությունը չի լինի:
Անդրադառնալով ԲՀԿ առաջնորդ Գագիկ Ծառուկյանի հայտարարությանը նախագահական ընտրությունների վերաբերյալ՝ բանախոսն ասաց, որ նա լուրջ փոփոխություն էր մտցրել ՀՀ ներքաղաքական իրականության մեջ։ Կային հույսեր, որ Ծառուկյանը կմասնակցեր, և եթե նա մասնակցեր, ընտրություններն այլ պատկեր կունենային:
«Ես վախենում եմ, որ գալիք նախագահական ընտրությունների արդյունքները կանխատեսված են: Ես չեմ տեսնում Սերժ Սարգսյանին լուրջ մրցակցության արժանի քաղաքական գործիչ: Չեմ կարծում, որ նման թեկնածու կձևավորվի մոտ ապագայում, քանի որ քաղաքականության մեջ նման բան չի լինում: Հետևաբար, արդյունքներն առաջին փուլից հետո պարզ կլինեն: Թեև «Հանրապետական» կուսակցության հիմնական խնդիրը 80-85 % չստանալն է, որը ստեղծված իրավիճակում հեշտ չէ»,- նշեց Ալեքսանդր Իսկանդարյանը՝ շարունակելով, թե հետընտրական պրոցեսներից ևս ինչ բան կախված է լինելու:
Խոսելով ՀԱԿ-Բագրատյան խնդրից՝ Իսկանդարյանն ասաց, որ յուրաքանչյուր քաղաքական ուժի ներսում էլ տարաձայնություններ լինում են, դա նորմալ պրոցես է: Նրա խոսքով՝ Հանրապետականում էլ կան խնդիրներ, ԲՀԿ-ում էլ, «Ժառանգություն»-ում էլ, «Ժառանգություն» – «Ազատ դեմոկրատներ» հարթության վրա էլ. դա էական վատ կամ լավ բան չէ:
«ՀԱԿ-ն ունի երեք տարբերակ: Առաջին տարբերակը թեկնածու չունենալն է: Երկրորդ տարբերակը Լևոն Տեր-Պետրոսյանի առաջադրումն է, երրորդը՝ մեկ այլ թեկնածու ունենալը: Երկրորդ տարբերակը հասկանալի է, որ կմոբիլիզացնի հասարակության մի որոշ մասին, որի արդյունքում կստացվի 10-12 % ձայն։ Երրորդն այլ երիտասարդ թեկնածու ունենալն է, որպեսզի քիչ ձայն հավաքելու դեպքում նորմալ ընկալվի:
ՀԱԿ-ը պիրամիդային կուսակցություն է, մեկ լիդեր է ընդունում որոշումները։ Որոշումը դեռ չի ընդունվել կամ ընդունվել է ու չի հրապարկվում: Ես չգիտեմ՝ ինչ որոշում կունենա Լևոն Տեր-Պետրոսյանը: Կարծում եմ, կա հավանականություն, որ ինքը կառաջադրվի, և կա հավանականություն, որ մեկ այլ թեկնածու լինի: Չի բացառվում, որ Հրանտ Բագրատյանին սատարի ՀԱԿ-ը, բայց որոշումը մեկ մարդ է կայացնում»,- մեկնաբանեց Ալեքսանդր Իսկանդարյանը:
