Ադրբեջանական apa.az կայքի հաղորդմամբ, ԵԱՀԿ Մինսկի խմբի ամերիկացի համանախագահ Ռոբերտ Բրադտկեն, ելույթ ունենալով Կարնեգիի վաշինգտոնյան հիմնադրամում Լեռնային Ղարաբաղին նվիրված կոնֆերանսում, հայտարարել է, որ ղարաբաղյան հակամարտությունում ստատուս-քվոյի պահպանումը ձեռնտու է ինչ-որ մեկին:
Ընդգծելով, որ օրեր առաջ է վերադարձել տարածաշրջանից` Բրադտկեն հայտարարել է. «Տարածաշրջանում բնակվողներն արժանի են առավել լավ ու կայուն ապագա ունենալուն, ինչի համար էլ նրանք պետք է օգտվեն բոլոր հնարավորություններից:
Լեռնային Ղարաբաղի հակամարտությունը չի արժանանում անհրաժեշտ ուշադրության: Այդ հակամարտությունը գտնվում է ոչ թե «սառեցված» վիճակում, այլ` ընթացքի մեջ: Այնտեղ դրությունը դեռևս կայուն չէ, հակամարտությունը մշտապես չի լուսաբանվում մամուլի կողմից:
ԱՄՆ-ը բոլոր ջանքերը գործադրում է խնդրի խաղաղ կարգավորման համար` տվյալ խնդրի շուրջ սերտորեն համագործակցելով մյուս համանախագահ երկրների` Ռուսաստանի ու Ֆրանսիայի հետ:
Հնարավոր է` ստատուս-քվոյի պահպանումը ձեռնտու է ինչ-որ մեկին, սակայն տվյալ իրավիճակը չի երաշխավորում կայունություն»:
Հիշեցնենք, որ անցյալ ամիս «Chatham House» անվանմամբ հայտնի՝ բրիտանական Միջազգային հարաբերությունների թագավորական ինստիտուտի փորձագետ Ջեյմս Նիքսին հայտարարել էր. «Արևմուտքն անհրաժեշտ ուշադրությունը չի դարձնում ղարաբաղյան հակամարտության վրա, թեև այն ամենավտանգավորն է տարածաշրջանում:
Փորձագետների մեծ մասի կարծիքով, ղարաբաղյան հակամարտությունը տարածաշրջանում ամենապայթունավտանգն է, և դրանով նա գերազանցում է աբխազական, հարավօսական, ինչպես նաև մերձդնեստրյան հակամարտություններին:
Եվ չնայած այդ ամենին` Արևմուտքի հայացքը գամված է ոչ թե Ղարաբաղի, այլ` Իրանի, Իրաքի ու Աֆղանստանի վրա: Ես` որպես Կովկասի մասնագետ, դա բացատրում եմ Ղարաբաղի տարածքի փոքրությամբ: Արևմուտքի այդ անտարբերության պատճառով կարող են սարսափելի դեպքեր գրանցվել, ինչին որ ականատես եղանք Ռուանդայում, Կոսովոյում կամ էլ Իրաքում: Այսինքն՝ կարելի է ասել, որ Արևմուտքը ղարաբաղյան հակամարտությանը ուշադրություն կհատկացնի միայն արյուն թափվելուց հետո:
Արևմուտքում ղարաբաղյան հակամարտության մասին շատ քիչ բան գիտեն: Կարելի է կարծել, որ այսպես կոչված մինսկյան գործընթացը գտնվում է մահացած վիճակում: Առավել նպատակահարմար կլիներ, եթե ԵԱՀԿ Մինսկի խմբի եռանախագահներից մեկի կարգավիճակում, Ֆրանսիայի փոխարեն, հանդես գար ԵՄ-ը:
Սակայն դա էլ բավական չէ. անհրաժեշտ է, որ հակամարտող կողմերն իրենք ցանկանան վերջ դնել հակամարտությանը, տվյալ խնդրին մոտենան ինքնաքննադատաբար և ըմբռնումով վերաբարվեն միմյանց դիրքորոշումներին: Արևմուտքն այս հարցում միայն կարող է որոշ չափով օգնել»:
